અમદાવાદની એક સ્ટાર્ટઅપ કંપનીએ બનાવેલો થર્મલ ઈન્ફ્રારેડ કેમેરા 'તપસ-1' 1 ઓક્ટોબરે અમેરિકાના ફાલ્કન-9 રોકેટ દ્વારા અવકાશમાં લોન્ચ કરવામાં આવશે. આ કેમેરો પૃથ્વીથી લગભગ 500 કિલોમીટરની ઊંચાઈએ સ્થાપિત કરાશે અને ત્યાંથી પૃથ્વીનું થર્મલ મોનિટરિંગ કરશે.
કંપનીના જણાવ્યા અનુસાર, આ કેમેરો માત્ર 3 કિલો વજનનો છે, પરંતુ તે અતિ સૂક્ષ્મ થર્મલ માહિતી મેળવવા સક્ષમ છે. સામાન્ય સેટેલાઇટ કેમેરાથી દેખાય નહીં તેવા તાપમાનના ફેરફારોની હાઈ-રિઝોલ્યુશન તસવીરો તે ઝડપી શકે છે. 'તપસ-1' આશરે 3 વર્ષ સુધી કાર્યરત રહેશે.
આ ટેક્નોલોજી ખાસ કરીને ખેતી ક્ષેત્રે ઉપયોગી થશે. જમીન અને પાક સંબંધિત થર્મલ માહિતી મેળવવાથી ખેડૂતોને પાકની સ્થિતિ અને તાપમાનના પ્રભાવ અંગે સચોટ સમજ મળી શકે છે. ઉપરાંત, પૃથ્વીની સપાટી પરથી નીકળતા થર્મલ ઈન્ફ્રારેડ રેડિયેશનને કૅપ્ચર કરી, કૃત્રિમ બુદ્ધિ (AI)ની મદદથી તેનું ઊંડાણપૂર્વક વિશ્લેષણ કરી શકાશે.
કંપનીએ આ કેમેરો માત્ર 12 મહિનાના ટૂંકા ગાળામાં સ્વદેશી ટેક્નોલોજી સાથે તૈયાર કર્યો છે. ગુજરાત માટે આ લોન્ચિંગ સ્પેસ ટેક્નોલોજી ક્ષેત્રે સ્થાનિક સ્ટાર્ટઅપની ક્ષમતા દર્શાવતું મહત્વનું પગલું છે.