મુંબઈ: જાણીતી અભિનેત્રી તનિષા મુખર્જીએ મહારાષ્ટ્ર સ્ટેટ ઈલેક્ટ્રિસિટી બોર્ડ (MSEB) સામે ગંભીર આરોપો લગાવ્યા છે. તેમણે કહ્યું કે લોનાવાલામાં આવેલા તેમના પૈતૃક ઘરનું વીજ જોડાણ ઊંચા વીજ બિલને કારણે કાપી નાખવામાં આવ્યું છે. આ અંગે તેમણે મહારાષ્ટ્રના મુખ્યમંત્રી દેવેન્દ્ર ફડણવીસ અને કેન્દ્રીય ગૃહમંત્રી અમિત શાહને ટ્વિટર પર ટેગ કરીને ફરિયાદ કરી છે.
તનિષા મુખર્જી, જે વરિષ્ઠ અભિનેત્રી તનુજાની પુત્રી અને અભિનેત્રી કાજોલની બહેન છે, તેમણે સોશિયલ મીડિયા પર જણાવ્યું કે લોનાવાલામાં વીજળી વિભાગ ‘માફિયા’ની જેમ વર્તી રહ્યું છે. તેઓ ખૂબ વધારે બિલ મોકલી રહ્યા છે અને ચૂકવણી કરાવવા માટે વીજ પુરવઠો કાપી નાખે છે. આને તેમણે ગુનો ગણાવ્યો છે.
તનિષાએ ટ્વિટમાં લખ્યું, “લોનાવાલામાં મહારાષ્ટ્ર સ્ટેટ ઈલેક્ટ્રિસિટી બોર્ડ માફિયાની જેમ વર્તી રહ્યું છે! તેઓ ખૂબ વધારે વીજ બિલ મોકલી રહ્યા છે અને વીજ પુરવઠો કાપીને ચૂકવણી કરવા માટે મજબૂર કરી રહ્યા છે. આ એક ગુનો છે! નિયત તારીખ આવતા પહેલા જ શનિવારે સાંજે વીજળી કાપવા આવી પહોંચવું…” તેમણે ઉમેર્યું કે લોકોને બંધક જેવો અનુભવ થાય છે.
48 વર્ષીય તનિષાએ મુખ્યમંત્રી ફડણવીસ, ગૃહમંત્રી અમિત શાહ, યોગી આદિત્યનાથ અને ટાટા પાવરને ટેગ કરીને લખ્યું, “કૃપા કરીને લોનાવાલા આવો! અહીં કોઈ નિયમો કે કાયદા નથી. તેઓ મનસ્વી રીતે વર્તી રહ્યા છે!”
ઉલ્લેખનીય છે કે, તનિષા મુખર્જી બિગ બોસ સીઝન 7માં જોવા મળી હતી. તેમનું આ ટ્વિટ સોશિયલ મીડિયા પર ચર્ચાનું કેન્દ્ર બન્યું છે.