તમિલનાડુના પૂર્વ શાળા શિક્ષણ મંત્રી અંબિલ મહેશ પોય્યામોઝીની સેન્ટ્રલ ક્રાઇમ બ્રાન્ચ (CCB)એ ધરપકડ કરી છે. તેમના પર ખાનગી શાળાઓને કાયમી માન્યતા અને અન્ય સરકારી મંજૂરીઓ અપાવવાના બહાને આશરે 100 કરોડ રૂપિયાના કથિત કૌભાંડમાં સંડોવાયેલા હોવાનો આરોપ છે.
મદ્રાસ હાઇકોર્ટે તેમની આગોતરા જામીન અરજી ફગાવી દેતાં CCBની ટીમે અમીનજીકરાઈ સ્થિત તેમના એપાર્ટમેન્ટ પર દરોડો પાડીને તેમની ધરપકડ કરી હતી.
આ મામલો ત્યારે પ્રકાશમાં આવ્યો જ્યારે તમિલનાડુ ફેડરેશન ઑફ પ્રાયવેટ સ્કૂલ્સ ઍસોસિએશન્સના સચિવ ડીસી ઇલાંગોવને ફરિયાદ નોંધાવી. ફરિયાદમાં આરોપ મૂકાયો કે તમિલનાડુ પ્રાયવેટ સ્કૂલ્સ ઍસોસિએશનના કહેવાતા સ્થાપક પ્રમુખ બીટી અરાસાકુમાર અને ખજાનચી મુથુકુમારે વિવિધ ખાનગી શાળાઓના સંચાલકો પાસેથી 100 કરોડ રૂપિયાથી વધુની રકમ પડાવી લીધી હતી.
આરોપીઓએ શાળા સંચાલકોને શાળાઓની કાયમી માન્યતા, શાળાઓ અપગ્રેડ કરવાની મંજૂરી, નગર અને ગ્રામ આયોજન નિર્દેશાલય (DTCP) તરફથી ક્લિયરન્સ તેમજ અન્ય કાનૂની મંજૂરીઓ અપાવવાનું વચન આપ્યું હતું. અરાસાકુમારે દાવો કર્યો હતો કે સરકારમાં તેમની સારી પહોંચ છે. આ મંજૂરીઓના બદલામાં શાસક પક્ષ DMKના પાર્ટી ફંડમાં દાનના નામે કરોડો રૂપિયાની વસૂલાત કરવામાં આવી હતી.
પૈસા લીધા પછી પણ આરોપીઓએ ન તો શાળાઓને જરૂરી મંજૂરીઓ અપાવી કે ન તો નાણાં પરત કર્યા. આ મામલે CCBએ શરૂઆતમાં અરાસાકુમાર સામે ભ્રષ્ટાચાર નિવારણ કાયદાની કલમ 7 અને કલમ 12 હેઠળ ગુનો નોંધીને 27 જૂનના રોજ તેમની ધરપકડ કરી હતી. તેમની પૂછપરછ અને તપાસ દરમિયાન તત્કાલીન શાળા શિક્ષણ મંત્રી અંબિલ મહેશ પોય્યામોઝીની સંડોવણી સામે આવી હતી.
તપાસ આગળ વધતાં CCBની ટીમોએ 16 સપ્ટેમ્બરના રોજ ચેન્નાઈ અને ત્રિચીમાં 9 સ્થળોએ દરોડા પાડ્યા, જેમાં પૂર્વ મંત્રી મહેશ સાથે સંકળાયેલા 4 સ્થળોનો પણ સમાવેશ થતો હતો. આ કાર્યવાહી દરમિયાન અનેક મહત્ત્વના દસ્તાવેજો જપ્ત કરવામાં આવ્યા. ત્યારબાદ 29 સપ્ટેમ્બરના રોજ પણ વધુ સર્ચ ઓપરેશન હાથ ધરાયું.
આ કૌભાંડમાં નાણાકીય ગેરરીતિઓ સામે આવતાં એન્ફોર્સમેન્ટ ડિરેક્ટોરેટ (ED)એ પણ 1 ઑક્ટોબરના રોજ પ્રિવેન્શન ઑફ મની લોન્ડરિંગ ઍક્ટ (PMLA) હેઠળ ગુનો નોંધીને વધુ તપાસ શરૂ કરી છે.