સામાન્ય રીતે દુનિયાભરની સરકારો ભીખ માંગવાની સંખ્યા ઘટાડવા અથવા ભિખારીઓને પુનર્વસન કરાવવા યોજનાઓ બનાવતી હોય છે. ભારતમાં પણ ભીખ માંગવા માટે કોઈ સરકારી લાયસન્સ લેવાની જરૂર પડતી નથી. પરંતુ યુરોપના એક દેશમાં એક એવું શહેર છે, જ્યાં ભીખ માંગવી હોય તો પહેલાં સરકારી પરવાનગી લેવી પડે છે.
આ શહેર છે સ્વીડનનું એસ્કિલસ્ટૂના. અહીં વર્ષ 2019થી એક અનોખો નિયમ લાગુ કરવામાં આવ્યો છે, જેના હેઠળ લાયસન્સ વગર ભીખ માંગવી એ ગુનો ગણાય છે. કોઈ વ્યક્તિ રસ્તા પર ભીખ માંગે તે પહેલાં તેણે સ્થાનિક નગર પ્રશાસન પાસેથી સત્તાવાર મંજૂરી લેવી ફરજિયાત છે. મંજૂરી મળ્યા બાદ જ તે કાયદેસર રીતે ભીખ માંગી શકે છે.
આ વ્યવસ્થા હેઠળ ભીખ માંગનાર વ્યક્તિને લાયસન્સની સાથે માન્ય ઓળખપત્ર પણ આપવામાં આવે છે. લાયસન્સ મેળવવા માટે અરજદારે આશરે 250 સ્વીડિશ ક્રોના ચૂકવવા પડે છે. સૂત્રોના જણાવ્યા અનુસાર, આ નિયમનો મુખ્ય હેતુ શહેરમાં ભીખ માંગવાની પ્રવૃત્તિને નિયંત્રિત કરવાનો અને વ્યવસ્થા જાળવવાનો છે.
આ પગલાનો બીજો મહત્વનો ફાયદો એ છે કે શહેરમાં કેટલા લોકો ભીખ માંગી રહ્યા છે તેની સત્તાવાર માહિતી મળી રહે છે. આનાથી જરૂરિયાતમંદ લોકો સુધી સરકારી અને સામાજિક મદદ પહોંચાડવામાં તથા તેમને રોજગારની તકો ઉપલબ્ધ કરાવવામાં પણ સરળતા રહે છે.
નોંધ: આ સમાચારમાં આપવામાં આવેલી માહિતી સામાન્ય જાણકારી પર આધારિત છે.