મુંબઈ ક્રિકેટ એસોસિયેશન (MCA)એ સોમવારે જાહેરાત કરી છે કે સૂર્યકુમાર યાદવ સૈયદ મુશ્તાક અલી T20 ટ્રોફીમાં મુંબઈ ટીમની કેપ્ટનશીપ કરશે. ટીમમાં શિવમ દુબે, સરફરાઝ ખાન, શાર્દૂલ ઠાકુર અને તુષાર દેશપાંડે સહિતના અનુભવી ખેલાડીઓ સામેલ છે.
આ ટુર્નામેન્ટની શરૂઆત 14 નવેમ્બરે થશે, જ્યાં મુંબઈનો પ્રથમ મુકાબલો હૈદરાબાદ સામે રમાશે.
સૂર્યકુમારે કેપ્ટન બનાવાયા બાદ કહ્યું, "મુંબઈ માટે રમવું હંમેશાં ગર્વની વાત છે. ટીમમાં અનુભવી ખેલાડીઓ અને યુવા પ્રતિભાઓનું સારું મિશ્રણ છે. મને વિશ્વાસ છે કે બધા ખેલાડીઓ એકજૂથ થઈને સંપૂર્ણ ઉત્સાહ સાથે રમશે અને દરેક મેચમાં પોતાનું શ્રેષ્ઠ પ્રદર્શન કરશે."
ઉલ્લેખનીય છે કે મુંબઈની રણજી ટ્રોફી ટીમના કેપ્ટન સિદ્ધેશ લાડને T20 ટીમમાં સ્થાન મળ્યું નથી. રણજી ટ્રોફી લાંબા ફોર્મેટની ટુર્નામેન્ટ છે જ્યારે સૈયદ મુશ્તાક અલી ટ્રોફી T20 ફોર્મેટમાં રમાય છે, તેથી બંને ટીમો માટે ખેલાડીઓની પસંદગી અલગ-અલગ જરૂરિયાતોને ધ્યાનમાં રાખીને કરવામાં આવે છે.
મુંબઈની ટીમ: સૂર્યકુમાર યાદવ (કપ્તાન), અંગક્રિશ રઘુવંશી (વિકેટકીપર), દિવ્યાંશ સક્સેના, સુવેદ પારકર, મુશીર ખાન, સરફરાઝ ખાન, સાંઈરાજ પાટીલ, શિવમ દુબે, અથર્વ અંકોલેકર, શાર્દૂલ ઠાકુર, તુષાર દેશપાંડે, શમ્સ મુલાની, મેક્સવેલ સ્વામીનાથન, મોહિત અવસ્થી, સિલ્વેસ્ટર ડિસોઝા અને હાર્દિક તામોરે (વિકેટકીપર).
સૂર્યકુમારની આગેવાનીમાં ભારતે માર્ચ 2026માં T20 વર્લ્ડ કપનો ખિતાબ જીત્યો હતો. આ જીત સાથે ભારત સતત બે વખત આ ટ્રોફી જીતનારી પ્રથમ ટીમ બની હતી. આ પહેલાં તેણે 2025માં યોજાયેલા T20 એશિયા કપમાં પણ ભારતીય ટીમને ચેમ્પિયન બનાવી હતી.
સૂર્યકુમારે 2024ના T20 વર્લ્ડ કપમાં પણ ભારતની જીતમાં મહત્વની ભૂમિકા ભજવી હતી. સાઉથ આફ્રિકા સામેની ફાઇનલની છેલ્લી ઓવરમાં તેણે લોંગ-ઓફ પર ડેવિડ મિલરનો કેચ પકડ્યો હતો. મિલરની વિકેટ ભારત માટે અત્યંત મહત્વની હતી, કારણ કે સાઉથ આફ્રિકાને છેલ્લી ઓવરમાં જીતવા માટે 16 રન જરૂરી હતા.
સૂર્યકુમારે 113 T20 મેચમાં 3272 રન બનાવ્યા છે. તેની સરેરાશ 36.35 અને સ્ટ્રાઇક રેટ 162.94 રહ્યો છે. તેના નામે 4 સદી અને 25 અડધી સદી નોંધાયેલી છે. તેણે 297 ચોગ્ગા, 179 છગ્ગા ફટકાર્યા છે અને 58 કેચ પણ લીધા છે. સૂર્યકુમારને 2022 અને 2023માં ICC T20 ઇન્ટરનેશનલ ક્રિકેટર ઑફ ધ યર તરીકે પસંદ કરવામાં આવ્યો હતો.
વેસ્ટ ઇન્ડીઝમાં 2024નો T20 વર્લ્ડ કપ જીત્યા બાદ રોહિત શર્માએ આ ફોર્મેટમાંથી નિવૃત્તિ લઈ લીધી હતી. ત્યારબાદ સૂર્યકુમાર યાદવને ભારતની કમાન સોંપવામાં આવી હતી. જોકે 2026 T20 વર્લ્ડ કપ જીત્યા બાદ સૂર્યકુમારને કેપ્ટનપદેથી હટાવી દેવામાં આવ્યો અને આયર્લેન્ડ તથા ઈંગ્લેન્ડના પ્રવાસ માટે ભારતીય T20 ટીમમાં તેને સ્થાન મળ્યું નથી. તેની જગ્યાએ શ્રેયસ અય્યરને ટીમનો નવો કેપ્ટન બનાવવામાં આવ્યો છે.