દિવાળી અને છઠ મહાપર્વ નિમિત્તે સુરતમાંથી મોટી સંખ્યામાં પરપ્રાંતીય શ્રમિકો પોતાના વતન રવાના થઈ રહ્યા છે. આ દરમિયાન બિહારના ધારાસભ્ય અને નેતા પ્રશાંત કિશોરે ટ્રેનમાં થતી ભીડ અને અવ્યવસ્થા અંગે વીડિયો જારી કરીને ટીકા કરી છે. તેમણે કહ્યું કે, છઠ પર્વ નજીક આવી રહ્યો છે, છતાં રેલવે સ્ટેશનો પર શ્રમિકોને ટ્રેનમાં ચઢવામાં ભારે મુશ્કેલી પડી રહી છે. કેટલાક લોકોને ટ્રેનમાં જગ્યા ન મળતાં શૌચાલયમાં બેસીને મુસાફરી કરવી પડે છે.
પ્રશાંત કિશોરે વધુમાં જણાવ્યું કે, જે લોકો આ રીતે પરેશાન થઈને વતન જાય છે, તે લોકો પછી મતદાન વખતે 'મોદી-મોદી' કરીને મત આપે છે. તેમણે ચેતવણી આપી કે, જો આવી ભૂલ કરવામાં આવશે તો ગુજરાતના લોકો બુલેટ ટ્રેનમાં મુસાફરી કરશે, જ્યારે સામાન્ય લોકોના બાળકોને પેસેન્જર ટ્રેનમાં પણ જગ્યા મળશે નહીં. આ માટે તેમણે જવાબદારી સામાન્ય લોકોની ગણાવી હતી.
બીજી તરફ, પશ્ચિમ રેલવેએ વિપક્ષના આક્ષેપોનો જવાબ આપતાં સ્પષ્ટતા કરી છે કે, ઉધના સ્ટેશન પરથી દિવાળીના ત્રણ દિવસ પહેલા જ 111 ટ્રેનો ઉપલબ્ધ કરાવવામાં આવી હતી. છેલ્લા 10 દિવસમાં 2.70 લાખથી વધુ શ્રમિકોએ રેલવે સેવાનો લાભ લીધો છે.
સુરતના ઉધના રેલવે સ્ટેશન પરથી આ વર્ષે મુસાફરોની સંખ્યામાં ગત વર્ષની સરખામણીમાં 5થી 10 ટકાનો વધારો થયો છે. પશ્ચિમ રેલવેના આંકડા મુજબ, 1લી ઓક્ટોબરથી અત્યાર સુધીમાં 6 લાખથી વધુ મુસાફરોએ મુસાફરી કરી છે, જ્યારે છેલ્લા 10 દિવસમાં જ 2.70 લાખથી વધુ શ્રમિકો વતન રવાના થયા છે. મુસાફરોના આ ધસારાને કારણે રેલવેને અંદાજે 8 કરોડ રૂપિયાની આવક થઈ છે.
રેલવે વિભાગે ભીડને નિયંત્રિત કરવા અને માન્ય ટિકિટ ધારકોને સગવડ મળે તે માટે ખાસ વ્યવસ્થા કરી હતી. ઉધના વિસ્તારમાં દિવાળીના ત્રણ દિવસ પહેલા કુલ 111 ટ્રેનો ઉપલબ્ધ હતી, જેમાં 29 રેગ્યુલર અને 19 સ્પેશિયલ ટ્રેનોનો સમાવેશ થાય છે. રેલવે દ્વારા ટિકિટ ચેકિંગ ડ્રાઇવ ચલાવવામાં આવી હતી અને મુસાફરોને વિનંતી કરાઈ હતી કે તેઓ માન્ય ટિકિટ લઈને જ મુસાફરી કરે, જેથી અન્ય મુસાફરોને અસુવિધા ન થાય.
રેલવે અધિકારીઓએ જણાવ્યું કે, તેમનો પ્રયાસ હંમેશા સુવિધાઓ સુધારવાનો રહ્યો છે. મુસાફરોની સંખ્યા વધતાં અન-નોટિફાઇડ ટ્રેનો પણ ચલાવવામાં આવી અને વીકએન્ડમાં દર બે કલાકે ટ્રેનો ઉપલબ્ધ કરાવવામાં આવી છે.
ઉલ્લેખનીય છે કે, પ્રશાંત કિશોરનો જન્મ 1977માં બિહારના બક્સર જિલ્લામાં થયો હતો. તેમણે 2011માં ગુજરાતના તત્કાલીન મુખ્યમંત્રી નરેન્દ્ર મોદીની ટીમમાં જોડાવા માટે સંયુક્ત રાષ્ટ્રની નોકરી છોડી હતી. તેઓ ચૂંટણી વ્યૂહરચનાકાર તરીકે જાણીતા છે અને હાલમાં બિહારમાં ધારાસભ્ય છે.