સુરતના સારોલી વિસ્તારમાં આવેલા શ્યામ સંગીની ટેક્સ્ટાઇલ માર્કેટમાં 9 સપ્ટેમ્બરે રાત્રે લાગેલી ભીષણ આગ અકસ્માત નહીં, પરંતુ કાવતરું હોવાનું પોલીસ તપાસમાં બહાર આવ્યું છે. માત્ર ₹10,000 ના બાકી પગારના વિવાદમાં પૂર્વ એકાઉન્ટન્ટે માર્કેટમાં પેટ્રોલ છાંટીને આગ ચાંપી હતી, જેમાં અંદાજે ₹24 કરોડનું નુકસાન થયું છે.
ઘટનાની વિગત મુજબ, 9 સપ્ટેમ્બર 2026 ના રોજ મોડી રાત્રે સવા બાર વાગ્યાના સુમારે કુંભારીયા ત્રણ રસ્તા પાસે આવેલા શ્યામ સંગીની ટેક્સ્ટાઇલ માર્કેટના છઠ્ઠા માળે અચાનક આગ ફાટી નીકળી હતી. આ ઘટનામાં કરોડો રૂપિયાનો કાપડનો જથ્થો બળીને ખાખ થઈ ગયો હતો. સારોલી પોલીસ સ્ટેશનમાં નોંધાયેલી ફરિયાદના આધારે તપાસ કરતા, એક અજાણ્યો શખ્સ મોઢે સફેદ રૂમાલ બાંધી અને ખભા પર લટકાવેલી બેગમાંથી જ્વલનશીલ પદાર્થ (પેટ્રોલ) કાઢી આગ લગાડતો હોવાનું પ્રાથમિક તપાસમાં ખુલ્લું પડ્યું હતું. આથી પોલીસે ગુનો નોંધી વધુ તપાસ હાથ ધરી હતી.
સુરતનું ટેક્સ્ટાઇલ માર્કેટ સમગ્ર દેશમાં અગ્રેસર હોવાથી ગુનાની ગંભીરતાને ધ્યાને રાખી પોલીસ કમિશનરની સૂચનાથી ક્રાઈમ બ્રાન્ચની અલગ-અલગ ટીમો તપાસમાં જોતરાઈ હતી. તપાસ દરમિયાન ટેકનિકલ સર્વેલન્સ અને સીસીટીવીના આધારે ગુનાને અંજામ આપનાર આરોપી વિનોદ પંડિત સાવલે મહારાષ્ટ્રના ધુલિયાનો છે, જે સુરતના ડીંડોલીમાં રહેતો હોવાની ઓળખ થઈ હતી. ક્રાઈમ બ્રાન્ચે બાતમીના આધારે આરોપીને ડીંડોલી ફ્લાવર ગાર્ડન પાસેથી ઝડપી પાડ્યો હતો.
પકડાયેલા આરોપી વિનોદ સાવલેની કડક પૂછપરછ કરતા તેણે ગુનાની કબૂલાત કરતા જણાવ્યું હતું કે, તે શ્યામ સંગીની માર્કેટની એક દુકાનમાં એપ્રિલ-2026 થી માસિક ₹30,000 ના પગારે એકાઉન્ટન્ટ તરીકે નોકરી કરતો હતો. પરંતુ માલિક અને અન્ય કર્મચારી તેને 'એકાઉન્ટનું કામ આવડતું નથી' તેમ કહી નાની નાની બાબતોમાં હેરાન કરતા હોવાથી તેણે નોકરી છોડી દીધી હતી. નોકરી છોડ્યા બાદ તેના પગારના ₹10,000 લેવાના બાકી નીકળતા હતા, જે મેળવવા તેણે અનેક વાર માલિક હનુમાન જવરને વિનંતી કરી છતાં તેમણે પૈસા આપવાની આનાકાની કરી હતી. આથી ગુસ્સામાં આવીને 'દસ હજારની કિંમત શું હોય છે તે શેઠને બતાવવા' તેણે માર્કેટમાં આગ લગાડવાનું નક્કી કર્યું હતું.
આરોપીએ આગ લગાડવાના આયોજન સાથે અગાઉથી જ પેટ્રોલ પંપ પરથી ₹150નું પેટ્રોલ બોટલમાં ભરી પોતાની બેગમાં રાખી લીધું હતું. 8 સપ્ટેમ્બરના રોજ રાત્રે નવ વાગ્યે તે માર્કેટમાં પહોંચ્યો હતો અને પગથિયાં પર બેસીને માર્કેટ બંધ થવાની રાહ જોઈ હતી. મોડી રાત્રે સાડા બાર વાગ્યે માર્કેટ સુમસાન થતાં જ તેણે શેઠની દુકાનની બહાર પડેલા કાપડના પાર્સલ પર પેટ્રોલ છાંટી દીવાસળી ચાંપી દીધી હતી અને ત્યાંથી ફરાર થઈ ગયો હતો.
બીજા દિવસે સોશિયલ મીડિયા અને ન્યૂઝ ચેનલોમાં પોતાની સંડોવણી અંગે સમાચાર આવતાં જ આરોપી પોતાનો મોબાઈલ બંધ કરી રાજસ્થાનના ખાટુશ્યામ મંદિર તથા અયોધ્યા ખાતે ભાગી ગયો હતો. આજે તે સુરત પરત આવતાં જ ક્રાઈમ બ્રાન્ચે તેની ધરપકડ કરી કાયદેસરની કાર્યવાહી હાથ ધરી છે.