સુરતમાં ભાજપના પૂર્વ શહેર પ્રમુખ અને કોર્પોરેટર નીતિન ભજીયાવાલાએ પોતાના નિવાસસ્થાન નજીક થઈ રહેલા ગેરકાયદે કોમર્શિયલ બાંધકામ સામે ફરિયાદ કરી હતી. તેમની ફરિયાદ બાદ સુરત મહાનગરપાલિકા (SMC)ની કાર્યવાહી પર સવાલો ઊભા થયા છે.
ભજીયાવાલાના જણાવ્યા અનુસાર, ફરિયાદ કરવા છતાં સેન્ટ્રલ ઝોનના અધિકારી રાજેશ ગાંજાવાલાએ રાજકીય દબાણનું કારણ આપીને કાર્યવાહીમાં વિલંબ કર્યો હતો. આ મામલો મીડિયામાં આવ્યા બાદ SMC તંત્ર હરકતમાં આવ્યું અને અધિકારીઓની હાજરીમાં ગેરકાયદે બાંધકામ તોડવાની કામગીરી હાથ ધરવામાં આવી હતી.
અધિકારીઓએ જણાવ્યું કે પ્રારંભિક તબક્કે નોટિસ અપાઈ હતી, પરંતુ લાંબા સમય સુધી કાર્યવાહી ન થતા અને મીડિયાની દખલગીરી બાદ થયેલી આ કામગીરી મહાનગરપાલિકાની કાર્યપદ્ધતિ પર પ્રશ્નાર્થ ઊભો કરે છે.