સુરતના વેલંજા વિસ્તારમાં નવરાત્રિના ગરબા રમતી વખતે 39 વર્ષીય રત્નકલાકાર અજય અકબરીનું અચાનક મોત થયું છે. નીલકંઠ વરણી સોસાયટીમાં ગરબા રમી રહ્યા હતા ત્યારે તેમને છાતીમાં દુખાવો ઉપડ્યો અને તેઓ જમીન પર ઢળી પડ્યા હતા.
ઘટના બાદ સોસાયટીના લોકો દોડી આવ્યા હતા અને પરિવારજનોએ તેમને તાત્કાલિક ન્યૂ સિવિલ હોસ્પિટલ ખાતે ખસેડ્યા હતા. હોસ્પિટલમાં ફરજ પરના તબીબોએ તેમને મૃત જાહેર કર્યા હતા. તબીબોના પ્રાથમિક રિપોર્ટ મુજબ મોતનું કારણ હાર્ટ એટેક હોવાનું જણાવાયું છે.
મૃતક અજય અકબરી મૂળ જામનગર જિલ્લાના જામજોધપુરના વતની હતા અને સુરતમાં રત્નકલાકાર તરીકે કામ કરીને પરિવારનું ગુજરાન ચલાવતા હતા. તેમના અકાળ અવસાનથી ત્રણ સંતાનોએ પિતાની છત્રછાયા ગુમાવી છે અને પરિવારમાં શોકનો માહોલ છે.
આ ઘટના એ યાદ અપાવે છે કે હૃદયરોગનું જોખમ ફક્ત વૃદ્ધો પૂરતું મર્યાદિત નથી. નિષ્ણાતોના મતે હાઈ બ્લડ પ્રેશર (હાયપરટેન્શન) રક્તવાહિનીઓને નુકસાન પહોંચાડે છે, જેનાથી ધમનીઓની લવચીકતા ઘટે છે અને હાર્ટ એટેકનું જોખમ વધે છે. તેવી જ રીતે ખરાબ કોલેસ્ટ્રોલ ધમનીઓમાં જમા થઈને લોહીના પ્રવાહમાં અવરોધ ઉભો કરે છે, જે હૃદય સુધી લોહી પહોંચવામાં અડચણરૂપ બને છે.
ધૂમ્રપાનની ટેવ પણ ધમનીઓમાં લોહી ગંઠાવાનું કારણ બની શકે છે, જ્યારે સ્થૂળતા હાઈ બ્લડ પ્રેશર, ડાયાબિટીસ અને હૃદયરોગ સહિત ઘણી બીમારીઓનું જોખમ વધારે છે. નિયમિત કસરત અને સ્વસ્થ જીવનશૈલી છતાં આ ખતરા ટાળવા માટે નિયમિત આરોગ્ય તપાસ અને તબીબી સલાહ લેવી જરૂરી છે.