સુરતના સરથાણા વિસ્તારમાં નકલી પોલીસ બનીને ખંડણી વસૂલતી ગેંગનો પર્દાફાશ થયો છે. આરોપીઓએ પોતાને ગાંધીનગર સાયબર ક્રાઈમ પોલીસના અધિકારી તરીકે ઓળખાવીને ગેલેરિયા કોમ્પ્લેક્સની ઓફિસમાંથી ત્રણ વેબ ડેવલપર્સનું અપહરણ કર્યું હતું. ત્યારબાદ સરકારી લખાણવાળી ઇનોવા કારમાં બેસાડીને તેમને ધમકાવીને 50 લાખ રૂપિયાની ખંડણી માગી હતી. જોકે, આરોપીઓ ચાર લાખ રૂપિયા પડાવવામાં સફળ રહ્યા હતા. આ મામલે ફરિયાદ નોંધાયા બાદ સરથાણા પોલીસે કાર્યવાહી કરીને ગાંધીનગરના ચાર આરોપીઓને ઝડપી પાડ્યા છે.
મળતી માહિતી મુજબ, આરોપીઓએ પોલીસ અધિકારી હોવાની ખોટી ઓળખ ઊભી કરી હતી. તેઓ સરથાણાના ગેલેરિયા કોમ્પ્લેક્સમાં આવેલી ઓફિસે પહોંચ્યા હતા અને ત્યાંથી ત્રણ વેબ ડેવલપર્સને પોતાની સાથે લઈ ગયા હતા. સરકારી લખાણવાળી ઇનોવા કારમાં બેસાડીને તેમને ધમકાવવામાં આવ્યા હતા. ત્યારબાદ તેમની પાસેથી 50 લાખ રૂપિયાની ખંડણીની માગણી કરવામાં આવી હતી. આ દરમિયાન આરોપીઓએ ચાર લાખ રૂપિયા પડાવી લીધા હતા.
ઘટના અંગે ફરિયાદ નોંધાયા બાદ સરથાણા પોલીસે અલગ-અલગ ટીમો બનાવીને તપાસ શરૂ કરી હતી. ટેકનિકલ સર્વેલન્સ અને હ્યુમન સોર્સની મદદથી પોલીસે તપાસનો દોર ગાંધીનગર સુધી લંબાવ્યો હતો. અંતે ગાંધીનગરના ચાર આરોપીઓને ઝડપી પાડવામાં સફળતા મળી હતી.
પોલીસે આરોપીઓ પાસેથી આશરે 15 લાખ રૂપિયાની ઇનોવા કાર, ચાર મોબાઈલ ફોન અને બે લાખ રૂપિયા રોકડા સહિત કુલ 17.70 લાખ રૂપિયાનો મુદ્દામાલ કબજે કર્યો છે. આ ગુનામાં સંડોવાયેલા અન્ય બે આરોપીઓને વોન્ટેડ જાહેર કરવામાં આવ્યા છે. હાલમાં સરથાણા પોલીસે ઝડપાયેલા આરોપીઓ સામે કાયદેસરની કાર્યવાહી હાથ ધરી છે અને ફરાર આરોપીઓને ઝડપી પાડવા સહિત સમગ્ર કૌભાંડમાં અન્ય કોઈની સંડોવણી છે કે કેમ તે દિશામાં વધુ તપાસ શરૂ કરી છે. પોલીસની ખોટી ઓળખ આપીને અપહરણ અને ખંડણી વસૂલવાના આ કિસ્સાએ શહેરમાં ચકચાર મચાવી છે.