સુરત સાયબર ક્રાઇમ બ્રાન્ચે શેરબજારમાં રોકાણના નામે કરોડો રૂપિયાની છેતરપિંડી કરતી એક આંતરરાષ્ટ્રીય ગેંગનો પર્દાફાશ કર્યો છે. પોલીસે આ ગેંગના બે સાગરીતોની ધરપકડ કરી છે. આ કાર્યવાહીથી શેરબજારના નામે ચાલતા મોટા આંતરરાષ્ટ્રીય ષડયંત્ર પરથી પડદો ઊંચકાયો છે.
પ્રાથમિક તપાસમાં જાણવા મળ્યું છે કે આરોપીઓ ભોળા ગ્રાહકોને ફસાવવા માટે બોગસ એપ્લિકેશનનો ઉપયોગ કરતા હતા. તેઓ નકલી કરંટ એકાઉન્ટ બનાવીને રોકાણકારોના નાણાં જમા કરાવતા હતા. તાજેતરમાં જ આ ગેંગે સુરતના એક ફરિયાદીને શેરબજારમાં ઊંચા વળતરની લાલચ આપી હતી. બોગસ એપના માધ્યમથી વિશ્વાસમાં લઈને આરોપીઓએ ફરિયાદી પાસેથી 24.38 લાખ રૂપિયથી વધુની રકમ પડાવી લીધી હતી. આ બનાવની સત્તાવાર ફરિયાદ નોંધાતા જ સાયબર ક્રાઇમ બ્રાન્ચ તરત જ હરકતમાં આવી હતી.
પોલીસે પકડાયેલા આરોપીઓની સઘન પૂછપરછ કરી ત્યારે આ કૌભાંડના તાર દેશવ્યાપી હોવાનું ખૂલ્યું હતું. તપાસ દરમિયાન પોલીસને 96 શંકાસ્પદ બેંક એકાઉન્ટની માહિતી મળી હતી. આ એકાઉન્ટની ઊંડાણપૂર્વક તપાસ કરતા જાણવા મળ્યું કે દેશભરના અલગ અલગ રાજ્યોમાં આ ગેંગ વિરુદ્ધ 338 ફરિયાદો અગાઉથી નોંધાયેલી છે. આ તમામ ફરિયાદોનો આંકડો ભેગો કરતા અત્યાર સુધીમાં 410 કરોડ રૂપિયાથી વધુના કથિત ફ્રોડનો ખુલાસો થયો છે.
આ સામાન્ય છેતરપિંડી નથી, પરંતુ એક સુનિયોજિત આંતરરાષ્ટ્રીય નેટવર્ક છે. સાયબર ક્રાઇમની તપાસમાં એવો પણ ઘટસ્ફોટ થયો છે કે ઝડપાયેલા આરોપીઓ માત્ર એજન્ટ તરીકે કામ કરતા હતા. છેતરપિંડીથી મેળવેલા કરોડો રૂપિયાના કાળા નાણાંમાંથી પોતાનું નિશ્ચિત કમિશન કાપીને તેઓ વિદેશ મોકલી દેતા હતા. આ જંગી રકમ દુબઈ અને ચીનમાં બેઠેલી મુખ્ય ગેંગ સુધી પહોંચાડવા માટે તેઓ USDT જેવી ક્રિપ્ટોકરન્સીનો આધુનિક માર્ગ અપનાવતા હતા.
હાલમાં પોલીસે આ સમગ્ર નેટવર્કના મૂળ સુધી પહોંચવા અને વિદેશમાં બેઠેલા મુખ્ય સૂત્રધારોની કડીઓ મેળવવા માટે તપાસના ચક્રો વધુ ગતિમાન કર્યા છે. સુરત પોલીસની આ કામગીરી સામાન્ય નાગરિકો માટે ચેતવણી સમાન છે કે અજાણી એપ્લિકેશન પર ભરોસો કરીને રોકાણ કરવાનું ટાળવું જોઈએ.