સુરતની સિવિલ હોસ્પિટલના જૂના NICU (નિયોનેટલ ઇન્ટેન્સિવ કેર યુનિટ) વિભાગમાં શુક્રવારે આગ લાગી હતી. આ ઘટના સમયે ત્યાં કોઈ દર્દી કે સ્ટાફ હાજર ન હોવાથી મોટી જાનહાનિ ટળી હતી.
હોસ્પિટલના સુપરિન્ટેન્ડેન્ટના જણાવ્યા અનુસાર, પહેલા માળે PIU ઇલેક્ટ્રિક વિભાગનું રેકોર્ડ સેક્શન ખસેડવાનું કામ ચાલી રહ્યું હતું. આ દરમિયાન AC ડક્ટ્સ કાપવાના કામ દરમિયાન ઇલેક્ટ્રિક શોર્ટ સર્કિટ થયો અને આગ લાગી. ફાયર વિભાગના અધિકારીઓએ જણાવ્યું કે, કેન્દ્રીય AC સિસ્ટમની ડક્ટમાં વેલ્ડિંગ કામ દરમિયાન થર્મોકોલ શીટ્સ અને રેપર્સમાં આગ લાગી હોઈ શકે છે.
આગની જાણ થતાં જ ફાયર વિભાગને જાણ કરવામાં આવી. ફાયર વિભાગની 8 થી 10 ગાડીઓ તાત્કાલિક ઘટનાસ્થળે પહોંચી અને પાણીનો મારો ચલાવીને આગને કાબૂમાં લેવાના પ્રયાસો શરૂ કર્યા. હોસ્પિટલના કર્મચારીઓએ પણ ફાયર સેફ્ટીના સાધનોનો ઉપયોગ કરીને શરૂઆતમાં આગ બુઝાવવાનો પ્રયાસ કર્યો. સુરત મહાનગરપાલિકાની ફાયર સેફ્ટી વાન પણ ઘટનાસ્થળે પહોંચી હતી.
રાહતની વાત એ છે કે, જે વિસ્તારમાં આગ લાગી હતી તે જૂનો NICU વિભાગ હાલમાં કાર્યરત ન હતો. હોસ્પિટલના અધિકારીઓએ સ્પષ્ટતા કરી કે, આગ લાગી તે સમયે ત્યાં કોઈ દર્દી, નવજાત શિશુ કે સ્ટાફ હાજર ન હતો. તેમજ કોઈ મહત્વપૂર્ણ રેકોર્ડ પણ ત્યાં રાખવામાં આવ્યા ન હતા. આથી કોઈને શારીરિક નુકસાન થયું નથી કે જાનહાનિ થઈ નથી.
હાલમાં આગ સંપૂર્ણપણે કાબૂમાં આવી ગઈ છે. ફાયર વિભાગે આગ લાગવાનું ચોક્કસ કારણ જાણવા તપાસ શરૂ કરી છે. પ્રાથમિક દ્રષ્ટિએ ઇલેક્ટ્રિક શોર્ટ સર્કિટ અને મેન્ટેનન્સ કામ દરમિયાન થયેલી બેદરકારીને કારણે આગ લાગી હોવાનું મનાય છે. આ ઘટનાએ હોસ્પિટલોમાં ફાયર સેફ્ટી અને રિપેરિંગ કામો દરમિયાન લેવાતી સાવચેતીના મહત્વ પર ફરી એકવાર ભાર મૂક્યો છે.