સુરતથી ચેન્નઈ વચ્ચેની મુસાફરી હવે ઘણી ઝડપી બનશે. ભારતમાલા પરિયોજના હેઠળ બની રહેલા હાઈ-સ્પીડ એક્સપ્રેસવેને કારણે આ અંતર 36 કલાકને બદલે માત્ર 16 કલાકમાં પૂરું થશે. આ 6-લેન ગ્રીનફિલ્ડ કોરિડોર ગુજરાતને મહારાષ્ટ્ર, કર્ણાટક, તેલંગાણા, આંધ્રપ્રદેશ અને તમિલનાડુ સાથે સીધું જોડશે.
પહેલાં આ એક્સપ્રેસવે 1,271 કિલોમીટર લાંબો પ્રસ્તાવિત હતો. પરંતુ તાજેતરમાં રૂટમાં ફેરફાર કરીને સુરત-નાસિક ભાગને અલગ કરવામાં આવ્યો છે. હવે આ પ્રોજેક્ટ મુખ્યત્વે 'નાસિક-ચેન્નઈ એક્સપ્રેસવે' તરીકે ઓળખાશે અને તેની લંબાઈ આશરે 900 કિલોમીટર રહેશે. તેમ છતાં, સુરત અને ચેન્નઈ વચ્ચે મુખ્ય કનેક્ટિવિટી આ કોરિડોર દ્વારા જ મળશે. હાલમાં પરંપરાગત રાષ્ટ્રીય ધોરીમાર્ગો પર ભારે ટ્રાફિકને કારણે 35થી 36 કલાક લાગે છે, જે નવા એક્સપ્રેસવેથી ઘટીને 16 કલાક થઈ જશે.
આ 6-લેન કોરિડોર દેશના ઘણા ઔદ્યોગિક, પર્યટન અને ધાર્મિક સ્થળોને જોડશે. ગુજરાતમાં સુરત, મહારાષ્ટ્રમાં નાસિક, અહમદનગર, સોલાપુર, અક્કલકોટ, કર્ણાટકમાં કલબુર્ગી (ગુલબર્ગા) અને રાયચૂર, તેલંગાણામાં ગઢવાલ, આંધ્રપ્રદેશમાં કુર્નૂલ, કડપ્પા અને તિરુપતિ તેમજ તમિલનાડુમાં ચેન્નઈ સીધા જોડાશે. તિરુપતિ જેવા ધાર્મિક સ્થળ સાથે સીધું જોડાણ મળવાથી પ્રવાસનને વેગ મળશે.
મહારાષ્ટ્ર સરકારે ₹19,142 કરોડના ખર્ચે બનનારા 374 કિલોમીટર લાંબા નાસિક-સોલાપુર-અક્કલકોટ ગ્રીનફિલ્ડ સેક્શનને મંજૂરી આપી છે. કર્ણાટક અને આંધ્રપ્રદેશ વચ્ચેના 177 કિલોમીટરના રૂટ પર જમીન સંપાદન અને બાંધકામ શરૂ થઈ ચૂક્યું છે. ભારતીય રાષ્ટ્રીય રાજમાર્ગ પ્રાધિકરણ (NHAI)એ આખો એક્સપ્રેસવે 2027ના અંત સુધીમાં પૂરો કરવાનો લક્ષ્યાંક રાખ્યો છે.
મહારાષ્ટ્ર રાજ્ય માર્ગ વિકાસ નિગમ (MSRDC) હિન્દુ હૃદયસમ્રાટ બાળાસાહેબ ઠાકરે મહારાષ્ટ્ર સમૃદ્ધિ મહામાર્ગ મારફતે આ રૂટને મુંબઈ-અમદાવાદ હાઈવે સાથે જોડશે. દિલ્હી-મુંબઈ એક્સપ્રેસવે સાથે પણ તેનું પરોક્ષ જોડાણ રહેશે, જેથી દેશના તમામ ભાગો માટે તેની ઉપયોગિતા વધશે.