સુપ્રીમ કોર્ટે એક મહત્ત્વપૂર્ણ ચુકાદામાં કહ્યું છે કે હિન્દુ ધર્મ છોડીને અન્ય ધર્મ અપનાવનાર વ્યક્તિ હવે અન્ય પછાત વર્ગ (OBC) કે અનુસૂચિત જાતિ (SC) ક્વોટા હેઠળ અનામતનો દાવો કરી શકશે નહીં. કોર્ટે મદ્રાસ હાઈકોર્ટના ચુકાદાને યથાવત્ રાખતાં તમિલનાડુ સરકારના સરકારી આદેશને રદ કર્યો છે.
આ મામલો તમિલનાડુ સરકારના નિર્ણય સાથે જોડાયેલો છે. રાજ્ય સરકારે 7 મુસ્લિમ સમુદાયોને પછાત વર્ગ તરીકે માન્યતા આપતો સરકારી આદેશ બહાર પાડ્યો હતો. આ આદેશ હેઠળ જે લોકોએ ઇસ્લામ ધર્મ અપનાવ્યો હતો, તેમને 'બેકવર્ડ ક્લાસ મુસ્લિમ' શ્રેણીમાં સામેલ કરીને અનામતનો લાભ આપવાની જોગવાઈ હતી.
મદ્રાસ હાઈકોર્ટે પહેલા જ આ આદેશને રદ કર્યો હતો. તમિલનાડુ સરકારે હાઈકોર્ટના ચુકાદાને સુપ્રીમ કોર્ટમાં પડકાર્યો હતો. સુપ્રીમ કોર્ટની જસ્ટિસ પી. કે. મિશ્રા અને જસ્ટિસ શ્રી ચંદ્રશેખરની વિશેષ પીઠે સોમવારે મદ્રાસ હાઈકોર્ટના ચુકાદાને સંપૂર્ણપણે યથાવત્ રાખ્યો.
કોર્ટે પોતાના અવલોકનમાં જણાવ્યું કે હિન્દુ સામાજિક વ્યવસ્થામાં જાતિગત પછાતપણું એક ચોક્કસ વ્યવસ્થાનો ભાગ છે. જ્યારે કોઈ વ્યક્તિ ધર્માંતરણ કરે છે ત્યારે એ પછાતપણું આપોઆપ બિન-હિન્દુ સામાજિક વ્યવસ્થામાં ટ્રાન્સફર થતું નથી. તેથી ધર્મ બદલ્યા બાદ ભૂતકાળના આધારે અનામતનો દાવો ચાલુ રાખી શકાય નહીં.
તમિલનાડુ સરકારે કોર્ટ સમક્ષ દલીલ કરી હતી કે ધર્મ પરિવર્તન પછી પણ જે લોકો સામાજિક અને શૈક્ષણિક રીતે પછાત છે, તેમને અનામતનો લાભ મળવો જોઈએ. જોકે સુપ્રીમ કોર્ટે આ દલીલને સ્વીકારી નહીં અને સ્પષ્ટ કર્યું કે ફક્ત ભૂતકાળમાં પછાત વર્ગ કે અનુસૂચિત જાતિમાં હોવાના આધારે ધર્મ બદલ્યા પછી એ જ આધારે અનામત ચાલુ રાખી શકાય નહીં. આ ચુકાદો ધર્માંતરણ અને અનામત અંગેની કાનૂની સ્થિતિ સ્પષ્ટ કરે છે.