ભારતીય વાયુસેનાના સુખોઈ-30MKI ફાઈટર જેટને હવે 'સુપર સુખોઈ' તરીકે અપગ્રેડ કરવામાં આવશે. આ અપગ્રેડથી વિમાનની ક્ષમતામાં નોંધપાત્ર વધારો થશે, જેનાથી ચીન અને પાકિસ્તાનની ચિંતા વધી શકે છે.
આ કાર્યક્રમ હેઠળ વિમાનના રડાર સિગ્નેચરને ઘટાડવા માટે DRDO દ્વારા વિકસિત સ્વદેશી 'રડાર એબ્સોર્બન્ટ મટિરિયલ' (RAM) નો ઉપયોગ કરવામાં આવશે. આ સામગ્રી રડાર તરંગોને શોષી લે છે, જેનાથી દુશ્મનના રડાર પર સુખોઈની ઓળખ પહેલા કરતા ઘણી મોડી થશે. જોધપુર સ્થિત ડિફેન્સ લેબોરેટરી દ્વારા વિકસિત આ પોલિયુરેથેન આધારિત કોટિંગથી વિમાનના ફ્રન્ટલ રડાર ક્રોસ સેક્શન (RCS)માં લગભગ 50 થી 70 ટકા સુધીનો ઘટાડો થવાનો અંદાજ છે.
સુખોઈને સંપૂર્ણ સ્ટેલ્થ વિમાન તો નહીં બનાવી શકાય, પરંતુ આ ટેક્નોલોજીથી દુશ્મન દેશોના રડાર તેને ખૂબ નજીક આવ્યા બાદ જ ટ્રેક કરી શકશે.
આ અપગ્રેડમાં સૌથી મહત્વનો ભાગ સ્વદેશી 'વિરૂપાક્ષ' AESA રડાર છે, જે ગેલિયમ નાઇટ્રાઇડ (GaN) ટેક્નોલોજી પર આધારિત છે. આ રડારમાં લગભગ 2,400 ટ્રાન્સમિટ-રિસીવ મોડ્યુલ હશે, જે 400 કિલોમીટરથી વધુ અંતરે રહેલા લક્ષ્યોને ટ્રેક કરી શકશે. જૂના 'બાર્સ' (Bars) રડારની સરખામણીમાં આ ઘણી વધુ સક્ષમ છે.
આ સાથે, વિમાનમાં 'ધૃતિ DR-118' ડિજિટલ રડાર વોર્નિંગ રિસિવર અને જામિંગ સિસ્ટમ ધરાવતું સ્વદેશી ઇલેક્ટ્રોનિક વોર્ફેર સૂટ પણ સામેલ કરવામાં આવી રહ્યું છે. આ સિસ્ટમ દુશ્મનના રડારને નિષ્ક્રિય કરવામાં મદદ કરશે.
આ અપગ્રેડથી ભારતીય વાયુસેનાને ચીનના 5મી પેઢીના J-20 સ્ટેલ્થ ફાઈટર જેટ અને પાકિસ્તાન સામે વધુ શક્તિશાળી સેન્સર, ઇલેક્ટ્રોનિક વોર્ફેર અને લાંબા અંતરની 'અસ્ત્ર' (Astra) મિસાઇલ ક્ષમતા મળશે.