વિશ્વભરમાં 'સુપર અલ નીનો'નો ખતરો વધી રહ્યો છે. 'ક્લાઇમેટ ઇમ્પેક્ટ લેબ'ના નવા રિપોર્ટ મુજબ, ઓક્ટોબર 2026થી માર્ચ 2027 વચ્ચે અતિશય ગરમીને કારણે 3,73,000થી વધુ લોકોના મોત થઈ શકે છે. આ આંકડો સામાન્ય સ્થિતિમાં થતા મોત કરતાં વધારાનો છે.
રિપોર્ટ પ્રમાણે, પૂર્વ-મધ્ય પેસિફિક મહાસાગરના 'નીનો 3.4' ક્ષેત્રમાં સમુદ્રની સપાટીનું તાપમાન સામાન્ય કરતાં 3.4 ડિગ્રી સેલ્સિયસ વધી ગયું છે. વિશ્વ હવામાન સંસ્થા (WMO)ના જણાવ્યા અનુસાર, નવેમ્બરથી જાન્યુઆરી વચ્ચે આ સ્થિતિ સામાન્ય 'અલ નીનો' કરતાં તાપમાનમાં છ ગણો વધારો કરી શકે છે, જેનાથી વિશ્વના હવામાનમાં મોટા ફેરફારો થઈ શકે છે.
ગરમીથી થતા મોતમાં સૌથી વધુ અસરગ્રસ્ત દેશોમાં નાઇજીરિયા (56,000થી વધુ મોત), ભારત (55,200થી વધુ), ઇન્ડોનેશિયા (29,300), બ્રાઝિલ (19,500) અને સુદાન (14,700)નો સમાવેશ થાય છે. રિપોર્ટ મુજબ, આગામી 6 મહિનામાં જ અડધાથી વધુ મોત નોંધાઈ શકે છે.
જૂન 2026થી માર્ચ 2027 સુધીના 9 મહિનાના ગાળામાં કુલ વધારાના મોતનો આંકડો 8,57,400 સુધી પહોંચી શકે છે. સંશોધકોના મતે, જૂન મહિનાથી જ અલ નીનોને કારણે વિશ્વભરમાં અંદાજે 4,84,500 વધારાના મોત નોંધાઈ ચૂક્યા છે. તેના કારણે ઇન્ડોનેશિયામાં જંગલોમાં આગ, મધ્ય અમેરિકામાં સૂકો અને ભારતમાં ચોમાસાના વરસાદમાં ઘટાડો જેવી અસરો જોવા મળી રહી છે.
ક્લાઇમેટ ઇમ્પેક્ટ લેબના સહ-સ્થાપક અને શિકાગો યુનિવર્સિટીના પ્રોફેસર માઇકલ ગ્રીનસ્ટોને જણાવ્યું કે, અતિશય ગરમીના જીવલેણ પ્રભાવોનું અગાઉથી અનુમાન લગાવવું એ મોટું પગલું છે. આ ડેટાથી નીતિ-નિર્માતાઓ અને સરકારોને સમયસર પગલાં ભરીને લોકોના જીવ બચાવવાનો મોકો મળશે.