રિસર્ચ ફર્મ હુરુને 2026 માટે વૈશ્વિક ભારતીય નેતાઓની યાદી જાહેર કરી છે. આ યાદીમાં ગૂગલની માતૃ કંપની આલ્ફાબેટના CEO સુંદર પિચાઈ પ્રથમ સ્થાને છે, જ્યારે માઇક્રોસોફ્ટના સત્ય નડેલા બીજા સ્થાને છે. માઇક્રોન ટેક્નોલોજીના સંજય મેહરોત્રા ત્રીજા સ્થાને છે.
આલ્ફાબેટની બજાર કિંમત 2024 પછી લગભગ બમણી (98% વધારો) થઈ છે, જ્યારે માઇક્રોસોફ્ટની કિંમત 17% ઘટી છે. આ કારણે પિચાઈ નડેલાથી આગળ નીકળ્યા છે. આલ્ફાબેટનું મૂલ્ય 395.19 લાખ કરોડ રૂપિયા સુધી પહોંચ્યું છે.
સૌથી નોંધપાત્ર વૃદ્ધિ સંજય મેહરોત્રાની કંપની માઇક્રોન ટેક્નોલોજીએ દર્શાવી છે. AI ચિપ્સની માંગને કારણે તેનું મૂલ્ય 1,174% વધીને 131.65 લાખ કરોડ રૂપિયા થયું છે.
ટોચની 5 યાદીમાં યુટ્યુબના નીલ મોહન અને ગૂગલ ક્લાઉડના થોમસ કુરિયનનો પણ સમાવેશ થાય છે. આ પાંચ કંપનીઓનું કુલ મૂલ્ય અંદાજે 855.82 લાખ કરોડ રૂપિયા છે.
હુરુનના જણાવ્યા અનુસાર, વિશ્વની 200 મોટી કંપનીઓમાં 236 ભારતીય નેતાઓ કાર્યરત છે. આ કંપનીઓ 53 લાખ લોકોને રોજગાર આપે છે અને તેમનું કુલ મૂલ્ય 15 ટ્રિલિયન ડોલર (અંદાજે 1,410.73 લાખ કરોડ રૂપિયા) છે, જે 2024ની સરખામણીમાં 53% વધુ છે.
પ્રથમ વખત AIને અલગ ઉદ્યોગ તરીકે યાદીમાં સ્થાન મળ્યું છે, જેમાં 18 કંપનીઓનું કુલ મૂલ્ય 21.35 લાખ કરોડ રૂપિયા છે. એકંદરે 200માંથી 103 કંપનીઓ AI-આધારિત અથવા AI-સંકલિત છે, જેમનું મૂલ્ય 1,006.18 લાખ કરોડ રૂપિયા છે. સ્ટાર્ટઅપ્સમાં પણ AIનું વર્ચસ્વ છે; 60 બિલિયન ડોલર કિંમત ધરાવતું 'કર્સર' સૌથી મૂલ્યવાન સ્ટાર્ટઅપ છે. ટોચના 10 સ્ટાર્ટઅપ્સમાંથી 7 AI સાથે જોડાયેલા છે અને તે બધા અમેરિકામાં છે.
ભારતીય મૂળના 177 લીડર્સ અમેરિકામાં છે, જેમાંથી 91 કેલિફોર્નિયામાં અને 40 સાન ફ્રાન્સિસ્કોમાં રહે છે. ડાંગોટે ગ્રુપના એમડી અરવિંદ પાઠકને કારણે આફ્રિકા પણ પ્રથમ વખત યાદીમાં સામેલ થયું છે, જેનાથી પાંચ ખંડોમાં ભારતીય લીડર્સની હાજરી નોંધાઈ છે.
યાદીમાં 16 મહિલા લીડર્સ પણ છે, જેમની કંપનીઓનું કુલ મૂલ્ય 65.73 લાખ કરોડ રૂપિયા છે. અરિસ્તા નેટવર્ક્સના જયશ્રી ઉલ્લાલ સૌથી આગળ છે, ત્યારબાદ રેશમા કેવલરમાની અને ગુંજન કેડિયા છે.
ઉંમરની દૃષ્ટિએ 23 વર્ષના આદર્શ હિરેમઠ અને સૂર્ય મિધા થી લઈને 79 વર્ષના રોમેશ વાધવાની સુધીના લોકો સામેલ છે. સરેરાશ ઉંમર 55 વર્ષ છે.
58% લીડર્સે ભારતમાં અભ્યાસ કર્યો છે. સૌથી વધુ 15 લીડર્સે IIT દિલ્હી, 12એ મુંબઈ યુનિવર્સિટી અને 11એ IIT મદ્રાસમાંથી અભ્યાસ કર્યો છે. પોસ્ટ-ગ્રેજ્યુએશન માટે 73% લીડર્સ અમેરિકા ગયા, જેમાં 19એ સ્ટેનફોર્ડ યુનિવર્સિટીમાંથી અભ્યાસ કર્યો છે.