ઓસ્ટ્રેલિયાના દિગ્ગજ ખેલાડી સ્ટીવ સ્મિથે ટેસ્ટ ક્રિકેટમાં એક ઐતિહાસિક સિદ્ધિ હાંસલ કરી છે. સાઉથ આફ્રિકા સામે ચાલી રહેલી ટેસ્ટ મેચ દરમિયાન તેમણે સૌથી વધુ કેચ લેવાનો રેકોર્ડ પોતાના નામે કર્યો છે. આ સાથે તેમણે ઇંગ્લેન્ડના સ્ટાર બેટ્સમેન જો રૂટને પાછળ છોડી દીધા છે.
સ્ટીવ સ્મિથે આ રેકોર્ડ સાઉથ આફ્રિકા સામેની પ્રથમ ટેસ્ટના ત્રીજા દિવસે (રવિવારે) બનાવ્યો. યજમાન ટીમની પ્રથમ ઇનિંગ્સમાં તેમણે પહેલો કેચ કેપ્ટન ટેમ્બા બાવુમાનો લીધો અને ત્યારબાદ ડેવિડ બેડિંગહામનો કેચ લેવાની સાથે રેકોર્ડ પોતાના નામે કર્યો.
સાઉથ આફ્રિકાની પ્રથમ ઇનિંગ્સની 28મી ઓવરના ત્રીજા બોલ પર ટેમ્બા બાવુમા આઉટ થયો. નેથન લાયનના બોલ પર સ્ટીવ સ્મિથે કેચ ઝડપ્યો. આ પછી 31મી ઓવરના પહેલા બોલ પર સ્મિથે વધુ એક શાનદાર કેચ ઝડપ્યો. આ કેચ ડેવિડ બેડિંગહામનો હતો, જે પોતાની અડધી સદીથી 1 રન દૂર રહી ગયો.
બેડિંગહામનો કેચ લેવાની સાથે સ્મિથ ટેસ્ટ ક્રિકેટમાં સૌથી વધુ કેચ લેનાર ખેલાડી બની ગયો છે. તેમણે ઇંગ્લેન્ડના જો રૂટને પાછળ છોડી દીધો છે. સ્મિથે ટેસ્ટમાં અત્યાર સુધી 221 કેચ પકડ્યા છે, જ્યારે 220 કેચ સાથે રૂટ બીજા સ્થાને પહોંચી ગયા છે.
ટેસ્ટ ક્રિકેટમાં સૌથી વધુ કેચ પકડનારા ટોપ-5 ફિલ્ડર:
1. સ્ટીવ સ્મિથ (ઓસ્ટ્રેલિયા) – 221*
2. જો રૂટ (ઇંગ્લેન્ડ) – 220*
3. રાહુલ દ્રવિડ (ભારત) – 210
4. મહેલા જયવર્ધને (શ્રીલંકા) – 205
5. જેક કાલિસ (સાઉથ આફ્રિકા) – 200
ઓસ્ટ્રેલિયા વિરુદ્ધ સાઉથ આફ્રિકા પ્રથમ ટેસ્ટની વાત કરીએ તો, ઓસ્ટ્રેલિયાની પ્રથમ ઇનિંગ્સ 390 રન પર સમાપ્ત થઈ હતી. મેટ રેનશોએ સૌથી વધુ 190 રન બનાવ્યા હતા. સાઉથ આફ્રિકા માટે પ્રથમ ઇનિંગ્સમાં વિલેમ મુલ્ડરે સૌથી વધુ 4 વિકેટ લીધી, માર્કો જેનસને 3 અને એનરિક નોર્ખિયાએ 2 વિકેટ ઝડપી.
સાઉથ આફ્રિકાની પ્રથમ ઇનિંગ્સ ચાલુ છે. સમાચાર લખાયા ત્યાં સુધી ટીમે 188 રન બનાવ્યા છે, પરંતુ તેની 6 વિકેટ પડી ચૂકી છે. ઓસ્ટ્રેલિયાના કેપ્ટન પેટ કમિન્સે શાનદાર બોલિંગ કરી, શરૂઆતની 6માંથી 3 વિકેટ લીધી.