સ્પેનમાં બુધવારે સવારે બે હાઈ-સ્પીડ ટ્રેનો વચ્ચે ભયાનક ટક્કર થઈ હતી. સ્પેનિશ મીડિયાના અહેવાલો અનુસાર, આ અકસ્માતમાં 46 લોકોનાં મોત થયાં છે. સ્પેનિશ અખબાર ‘અલ પાઈસ’ના જણાવ્યા મુજબ, એક ટ્રેને બીજી ટ્રેનને પાછળથી ટક્કર મારી હતી. અકસ્માતમાં અનેક લોકો ઘાયલ થયા છે. ઘટનાસ્થળે ઇમરજન્સી મેડિકલ ટીમો પહોંચી ગઈ છે અને બચાવ કાર્ય ચાલુ છે.
આ અકસ્માત સ્થાનિક સમય મુજબ સવારે 9 વાગ્યે થયો હતો. અકસ્માત બાદ રાજધાની મેડ્રિડને દક્ષિણના અંડાલુસિયા વિસ્તાર સાથે જોડતી રેલવે લાઇન બંધ કરી દેવામાં આવી છે.
અકસ્માત ટોલેડો પ્રાંતમાં લોસ યેબેનેસ અને ઉર્દા વચ્ચે થયો હતો. અકસ્માત સમયે ટ્રેનોની ઝડપ 200થી 210 કિમી પ્રતિ કલાકની આસપાસ હોવાનું અનુમાન છે. રેન્ફે AVE 2080 ટ્રેનની મહત્તમ ઝડપ 250 કિમી પ્રતિ કલાક અને ઇર્યો 6076 ટ્રેનની મહત્તમ ઝડપ 300 કિમી પ્રતિ કલાક સુધીની છે.
એક ટ્રેન સવારે 8 વાગ્યે મેડ્રિડથી સેવિલ માટે રવાના થઈ હતી, તે દરમિયાન બીજી ટ્રેન તેની સાથે અથડાઈ ગઈ. રેલવે નેટવર્કનું સંચાલન કરતી કંપની અડિફે દ્વારા સોશિયલ મીડિયા પ્લેટફોર્મ X પર આ અંગે માહિતી આપવામાં આવી હતી.
સ્પેનના વડાપ્રધાન પેદ્રો સાંચેઝે અકસ્માત પર દુઃખ વ્યક્ત કર્યું છે. તેમણે X પર લખ્યું કે ટ્રેન અકસ્માતના સમાચાર સાંભળીને તેઓ આઘાતમાં છે. તેમણે જણાવ્યું કે રાહત અને બચાવ ટુકડીઓ ઘટનાસ્થળે હાજર છે અને અસરગ્રસ્ત લોકોને મદદ કરી રહી છે.
ટોલેડો નજીક આવેલા ઉર્દા શહેરના મેયર મેન્યુઅલ ગાલાને જણાવ્યું કે બચાવ ટુકડીએ તેમને ઘાયલોની સારવાર અને સંભાળ માટે એક સ્પોર્ટ્સ હોલ તૈયાર રાખવા કહ્યું છે.
ઉલ્લેખનીય છે કે સ્પેનમાં આ અકસ્માત જાન્યુઆરીમાં થયેલા ટ્રેન અકસ્માત બાદ થયો છે. તે અકસ્માતમાં અંડાલુસિયાના અદામુઝ નજીક બે હાઈ-સ્પીડ ટ્રેનો અથડાઈ હતી અને 46 લોકોનાં મોત થયાં હતાં. સ્પેનની હાઈ-સ્પીડ રેલવે લાઇન પર થયેલો આ પ્રથમ મોટો ટ્રેન અકસ્માત હતો.