કોંગ્રેસ અધ્યક્ષા સોનિયા ગાંધીએ જાહેરાત કરી છે કે તેમનું પુસ્તક 'બિલોન્ગિંગ: અ જર્ની ઓફ લવ' આગામી 10 નવેમ્બરે રિલીઝ થશે. તેમણે મંગળવારે સોશિયલ મીડિયા પ્લેટફોર્મ X પર એક વીડિયો પોસ્ટ કરીને આ જાણકારી આપી. આ વીડિયોમાં તેમણે પુસ્તકના પાનાં ફેરવતાં જણાવ્યું કે તેઓ પોતાની કહાની પોતે કહેવા માંગે છે.
સોનિયા ગાંધીએ કહ્યું, 'ઘણા વર્ષોથી લોકો મારી કહાની કહેતા આવ્યા છે, હવે મારી કહાની કહેવાનો વારો મારો છે. જ્યારે મારું પુસ્તક બહાર પડશે ત્યારે થોડો હોબાળો ચોક્કસ થશે.' તેમણે વધુમાં જણાવ્યું કે અગાઉ ઘણી બધી વાતો મનઘડંત હતી અથવા તેમને વધારી-ચઢાવીને રજૂ કરવામાં આવી હતી. તેથી તેમને લાગ્યું કે હવે તેમણે પોતે જ તેમની કહાની લખવી જોઈએ અને તથ્યો તથા ઘટનાઓને એ જ રીતે જણાવવી જોઈએ, જેવી તે વાસ્તવમાં બની હતી.
ઉલ્લેખનીય છે કે સોનિયા ગાંધીએ ગયા અઠવાડિયે જ X પર પ્રવેશ કર્યો છે અને આ તેમની બીજી પોસ્ટ છે. તેમણે 22 ઓક્ટોબરે ઇન્સ્ટાગ્રામ પર અને 24 ઓક્ટોબરે X પર ડેબ્યૂ કર્યું હતું. પાંચ દિવસમાં તેમણે સોશિયલ મીડિયા પર ત્રીજો વીડિયો પોસ્ટ કર્યો છે.
પુસ્તકમાં સોનિયા ગાંધીએ તેમના જીવનના અનેક મહત્વપૂર્ણ પ્રસંગોનો ઉલ્લેખ કર્યો છે. તેમણે જણાવ્યું કે જ્યારે રાજીવ ગાંધીને દેશના વડાપ્રધાન બનાવવામાં આવી રહ્યા હતા, ત્યારે તેઓ આ નિર્ણયના વિરોધમાં હતા. તેમણે કહ્યું, 'હું ક્યારેય ઇચ્છતી નહોતી કે રાજીવ ગાંધી વડાપ્રધાન બને.'
પુસ્તકમાં સોનિયા ગાંધીએ 1970ના દાયકામાં ઇંગ્લેન્ડના કેમ્બ્રિજમાં રાજીવ ગાંધી સાથેની પ્રથમ મુલાકાતનો ઉલ્લેખ કર્યો છે. તેમણે કહ્યું કે પહેલી મુલાકાતમાં જ તેમને લાગ્યું કે રાજીવ એવા વ્યક્તિ છે જેમની સાથે તેઓ રહેવા ઇચ્છશે. બાદમાં તેમને ખબર પડી કે રાજીવને પણ આવું જ લાગ્યું હતું. બંનેની મિત્રતા પાર્ટીઓ, ફરવા જવા અને વિદ્યાર્થીઓની બેઠકોમાં સાથે સમય વિતાવવાથી આગળ વધતી ગઈ. સોનિયાએ રાજીવને 'ખૂબ સૌમ્ય અને આકર્ષક' વ્યક્તિ ગણાવ્યા હતા.
રાજીવ સાથે લગ્ન કર્યા બાદ સોનિયાએ નેહરુ-ગાંધી પરિવારમાં પોતાનું સ્થાન બનાવ્યું. પુસ્તકમાં તેમણે સાસુ અને તત્કાલીન વડાપ્રધાન ઇન્દિરા ગાંધી સાથેની પહેલી મુલાકાત તથા ભારતમાં પરિવાર સાથે વિતાવેલા જીવનના અનુભવોનો ઉલ્લેખ કર્યો છે. તેમણે લખ્યું છે કે ભાષા, ખાણીપીણી અને સંસ્કૃતિ સાથે તાલમેલ બેસાડવો પણ જીવનનો એક ભાગ હતો. પુસ્તકમાં હિન્દી શીખવા, સાડી પહેરવા અને ભારતીય જીવનશૈલી અપનાવવા વિશે પણ લખવામાં આવ્યું છે.
1984માં ઇન્દિરા ગાંધીની હત્યા બાદ રાજીવ ગાંધી વડાપ્રધાન બન્યા. સાત વર્ષ પછી, 1991માં રાજીવની પણ હત્યા કરી દેવામાં આવી. સોનિયાએ જણાવ્યું કે પોતાના લોકોને ગુમાવવાના દુઃખે તેમને જાહેર જીવન અને રાજકારણ તરફ ધકેલી દીધા. આ પહેલાં તેઓ પોતાના અંગત જીવનને જાહેર નજરોથી દૂર રાખવા માગતાં હતાં.
1991માં રાજીવની હત્યા બાદ પણ સોનિયા રાજકારણથી દૂર રહ્યાં. પી. વી. નરસિંહ રાવ વડાપ્રધાન બન્યા. 1996 સુધીમાં કોંગ્રેસ નબળી પડવા લાગી અને પાર્ટીમાં અનેક જૂથો બની ગયા. 1997માં કોંગ્રેસને એકજૂટ કરવા માટે સોનિયાએ પાર્ટીની પ્રાથમિક સદસ્યતા લીધી. 62 દિવસ બાદ, 1998માં તેઓ કોંગ્રેસ અધ્યક્ષ બન્યાં. સોનિયા 2017 સુધી અધ્યક્ષ રહ્યાં, જે પાર્ટીના ઇતિહાસમાં સૌથી લાંબો કાર્યકાળ છે.
2004માં કોંગ્રેસે 14 સહયોગી પક્ષો સાથે UPAની રચના કરી. ચૂંટણી પછી ડાબેરી પક્ષો સહિત અનેક પક્ષોના સમર્થનથી UPAને 335 સાંસદોનું સમર્થન મળ્યું. સહયોગીઓએ સોનિયા ગાંધીને પ્રધાનમંત્રી બનાવવાનું સમર્થન કર્યું, પરંતુ તેમણે 18 મે 2004ના રોજ પદ સ્વીકારવાનો ઇનકાર કરી દીધો. ત્યારબાદ મનમોહન સિંહ પ્રધાનમંત્રી બન્યા. જોકે, NDAએ સોનિયાના વિદેશી નાગરિક હોવાના મુદ્દાને ઉઠાવીને તેમના પ્રધાનમંત્રી બનવાનો વિરોધ કર્યો હતો. તેના કારણે સોનિયાએ પીએમ પદ સ્વીકારવાનો ઇનકાર કર્યો અને મનમોહન સિંહને પીએમ બનાવવાનો પ્રસ્તાવ મૂક્યો.