સોમનાથ મંદિર આસપાસ નોનવેજ વેચાણ પરના પ્રતિબંધને પડકારતી અપીલ પર સુપ્રીમ કોર્ટે હાલ કોઈ હુકમ કર્યો નથી. પરિણામે ગુજરાત હાઈકોર્ટે આપેલો સ્ટે યથાવત રહેશે. સુપ્રીમ કોર્ટે આ અપીલને બે મહિનામાં પૂરી કરવા નિર્દેશ આપ્યો છે.
ઘટનાક્રમ મુજબ, સોમનાથ મંદિર આસપાસની છ નોનવેજ રેસ્ટોરન્ટના માલિકોએ રાજ્ય સરકારના જાહેરનામાને હાઈકોર્ટમાં પડકાર્યું હતું. આ જાહેરનામા હેઠળ શહેરના ચોક્કસ વિસ્તારોમાં નોનવેજ વેચાણ અને સંગ્રહ પર પ્રતિબંધ મૂકવામાં આવ્યો હતો. હાઈકોર્ટના સિંગલ જજે સોમનાથ મંદિર આસપાસના વિસ્તારમાં આ પ્રતિબંધ પર સ્ટે આપ્યો હતો. આ સ્ટે સામે અરજદારોએ સુપ્રીમ કોર્ટમાં અપીલ કરી હતી.
અરજદારોના વકીલ અસરાર મન્સૂરીના જણાવ્યા અનુસાર, સુપ્રીમ કોર્ટે અપીલને બે મહિનામાં ઝડપથી પતાવવા નિર્દેશ આપ્યો છે. સ્ટે અંગે કોઈ હુકમ ન કર્યો હોવાથી હાઈકોર્ટનો સ્ટે ચાલુ રહેશે.
અરજદારોના જણાવ્યા મુજબ, 7 ઓક્ટોબરે હાઈકોર્ટમાં આ કેસની પ્રથમ સુનાવણી થઈ હતી. તે જ દિવસે મામલતદારે આ છ અરજદારો પાસે પોલીસ ચોકીમાં એક કબૂલાતનામા પર સહી કરાવી લીધી હતી કે તેઓ ભવિષ્યમાં નોનવેજ ખોરાક નહીં વેચે અને માત્ર શાકાહારી ચીજવસ્તુઓનો જ વેપાર કરશે. હાઈકોર્ટે સરકારને સવાલ પણ કર્યો હતો કે જે દિવસે હાઈકોર્ટમાં કેસની સુનાવણી ચાલી રહી હતી તે જ દિવસે મામલતદારે આ રેસ્ટોરન્ટ માલિકોની સહીઓ કેમ લીધી?