પાકિસ્તાનના ભૂતપૂર્વ ઝડપી બોલર સોહેલ તનવીરે ભારતીય ક્રિકેટના સિનિયર ખેલાડીઓ વિરાટ કોહલી અને રોહિત શર્માની પ્રશંસા કરી છે. તેમણે કહ્યું કે આ બંને ખેલાડીઓનું ટીમમાં રહેવું ભારતીય ક્રિકેટ માટે વરદાન સમાન છે.
દુબઈમાં ન્યૂઝ એજન્સી ANI સાથે વાત કરતાં તનવીરે કહ્યું, 'વિરાટ કોહલીના આંકડા એટલા શાનદાર છે કે તેમના વિશે કંઈ કહેવાની જરૂર જ નથી. તેમનું યોગદાન ફક્ત ભારતીય ક્રિકેટ પૂરતું નથી, પરંતુ વિશ્વ ક્રિકેટ માટે પણ મોટું છે. તેમણે ચાહકોને ખુશીની અસંખ્ય ક્ષણો આપી છે.'
તનવીરે કહ્યું કે જ્યાં સુધી કોહલી ફિટનેસ અને ફોર્મ જાળવી રાખે છે, ત્યાં સુધી તેમણે વધુમાં વધુ સમય રમવું જોઈએ. તેમણે ઉમેર્યું, 'જેમ મેં રોહિત વિશે કહ્યું હતું, તેમ કોહલી પણ જેટલો લાંબો સમય રમે, તેટલું ભારતીય ક્રિકેટ માટે સારું છે.'
રોહિત શર્માની 2027 વર્લ્ડ કપમાં ભાગ લેવાની શક્યતા અંગે પૂછાયેલા સવાલના જવાબમાં તનવીરે કહ્યું કે ઉંમરને હંમેશાં નકારાત્મક દૃષ્ટિએ જોવી જોઈએ નહીં. તેમણે કહ્યું, 'જો તમે ફિટ રહો છો અને સતત સારું પ્રદર્શન કરો છો, તો અનુભવ ટીમ માટે બમણો ફાયદો કરે છે. અનુભવી ખેલાડીઓ યુવા ખેલાડીઓને માર્ગદર્શન પણ આપી શકે છે.'
રોહિત શર્માની વાત કરીએ તો, તેણે તેની છેલ્લી પાંચ વન-ડે ઇનિંગ્સમાં સારું પ્રદર્શન કર્યું છે. વેસ્ટ ઇન્ડીઝ સામે મુલ્લાનપુરમાં 92 અને ગુવાહાટીમાં 101 રનની ઇનિંગ્સ રમી હતી, જ્યારે તિરુવનંતપુરમમાં 32 રન બનાવ્યા હતા. આ પહેલાં લોર્ડ્સમાં ઇંગ્લેન્ડ સામેની ત્રીજી વન-ડેમાં તેને 138 રનની શાનદાર ઇનિંગ રમી હતી.
તનવીરે સ્વીકાર્યું કે રોહિત માટે ટોચના સ્તરે ટકી રહેવા ફિટનેસ અને ફોર્મ બંને જરૂરી છે.