કેન્દ્રીય નાણાં મંત્રી નિર્મલા સીતારામણે જણાવ્યું છે કે ભારત 10%થી વધુ આર્થિક વિકાસ દર હાંસલ કરવાની ક્ષમતા ધરાવે છે. આ માટે ટેક્નોલોજી, ઇનોવેશન અને વિવિધ ક્ષેત્રોમાં નવી ટેકનોલોજીને ઝડપથી અપનાવવી જરૂરી રહેશે. તેમણે કૃષિ સહિતના અન્ય ક્ષેત્રોમાં ટેક્નોલોજીના ઉપયોગ પર ભાર મૂક્યો હતો, જે ઉત્પાદકતા વધારવામાં મદદ કરશે.
સીતારામણે કહ્યું કે, ભારતની આર્થિક ક્ષમતા વધારવામાં ટેક્નોલોજી અને ઇનોવેશનની મહત્વપૂર્ણ ભૂમિકા રહેશે. તેમણે 2015 પછી દેશમાં સ્ટાર્ટઅપ ઇકોસિસ્ટમના વિસ્તારનો પણ ઉલ્લેખ કર્યો. તેમના મતે, નવી ટેકનોલોજીનો ઉપયોગ માત્ર IT ક્ષેત્ર પૂરતો સીમિત ન રહેવો જોઈએ, પરંતુ કૃષિ સહિતના અન્ય ક્ષેત્રોમાં પણ તેનો વિસ્તાર થવો જોઈએ.
નાણાં મંત્રીએ કૃષિ ક્ષેત્રમાં ટેક્નોલોજીના ઉપયોગને પણ અત્યંત મહત્વપૂર્ણ ગણાવ્યો. આધુનિક ટેકનોલોજી દ્વારા ખેતીની ઉત્પાદકતા વધારવા અને ખેડૂતોની આવક સંબંધિત તકો સુધારવાની ક્ષમતા રહેલી છે. આનાથી અર્થતંત્રના મોટા હિસ્સાને વિકાસની પ્રક્રિયા સાથે જોડવામાં મદદ મળી શકે છે.
સરકારના ફેબ્રુઆરી 2026ના આંકડા મુજબ, નાણાકીય વર્ષ 2025-26માં ભારતનો વાસ્તવિક GDP ગ્રોથ 7.4% રહેવાનો અંદાજ મૂકવામાં આવ્યો હતો. જ્યારે, નાણાકીય વર્ષ 2026-27ના બજેટમાં નોમિનલ GDP ગ્રોથ 10% રહેવાનો અંદાજ છે. સરકારના જણાવ્યા અનુસાર, સર્વિસ સેક્ટર 9.1%ના દરે વધ્યું, જ્યારે મેન્યુફેક્ચરિંગ અને કન્સ્ટ્રક્શનમાં 7% વૃદ્ધિનો અંદાજ હતો.
ભારતની આર્થિક વૃદ્ધિમાં ઘરેલુ માંગની મહત્વની ભૂમિકા રહી છે. FY26માં પ્રાઇવેટ ફાઇનલ કન્ઝમ્પશન એક્સપેન્ડિચર (PFCE) 7% વધવાનો અંદાજ હતો અને GDPમાં તેનો હિસ્સો 61.5% રહેવાની વાત કહેવામાં આવી હતી. સરકારના જણાવ્યા મુજબ, રોકાણ પ્રવૃત્તિઓમાં પણ મજબૂતી જળવાઈ રહી છે, અને ગ્રોસ ફિક્સ્ડ કેપિટલ ફોર્મેશન (GFCF) માં 7.8% વૃદ્ધિનો અંદાજ હતો. જોકે, આર્થિક સર્વેક્ષણ 2025-26માં નાણાકીય વર્ષ 2026-27 માટે વાસ્તવિક GDP ગ્રોથનો અંદાજ 6.8-7.2% રાખવામાં આવ્યો હતો અને ભારતનો સંભવિત વિકાસ દર લગભગ 7% આંકવામાં આવ્યો હતો. તેવામાં 10%થી વધુ ગ્રોથનો લક્ષ્યાંક વર્તમાન અંદાજ કરતાં ઘણો વધારે છે.
સીતારામણના નિવેદનનો મુખ્ય ફોકસ ટેક્નોલોજી અને ઇનોવેશન દ્વારા ઉત્પાદકતા વધારવા પર છે. આ સાથે જ ભારતે મેન્યુફેક્ચરિંગ, સર્વિસિસ, કૃષિ, સ્ટાર્ટઅપ અને રોકાણ જેવા ક્ષેત્રોમાં સતત વિસ્તાર કરવો પડશે. સરકાર અગાઉ પણ જાહેર રોકાણ, ડિજિટલ ટ્રાન્સફોર્મેશન, શ્રમ સુધારા અને અર્થતંત્રના ઔપચારિકીકરણને ઉચ્ચ વિકાસ દરના મુખ્ય આધાર ગણાવતી રહી છે.