હૈદરાબાદ ક્રિકેટ એસોસિએશન (HCA)એ શનિવારે જાહેરાત કરી છે કે ભારતના ઝડપી બોલર મોહમ્મદ સિરાજ 2026-27ની રણજી ટ્રોફી સિઝનમાં હૈદરાબાદ ટીમના કેપ્ટન રહેશે.
આ સિઝન 11 ઓક્ટોબરે શરૂ થશે અને હૈદરાબાદની પહેલી મેચ ત્રિપુરા સામે રમાશે. ઝડપી બોલર ચામા મિલિંદને ટીમનો ઉપકેપ્ટન બનાવવામાં આવ્યો છે.
હૈદરાબાદને રણજી ટ્રોફીના એલિટ ગ્રુપ Bમાં રાખવામાં આવ્યું છે. આ ગ્રુપમાં સૌરાષ્ટ્ર, કર્ણાટક, પંજાબ, આંધ્રપ્રદેશ, છત્તીસગઢ, આસામ અને ત્રિપુરા પણ સામેલ છે.
સિરાજે ગયા વર્ષે પણ હૈદરાબાદની બે મેચમાં કેપ્ટની કરી હતી. તાજેતરમાં તે 2026ની દુલીપ ટ્રોફીમાં તિલક વર્માની કેપ્ટની હેઠળ સાઉથ ઝોનના ઝડપી બોલિંગ આક્રમણનું નેતૃત્વ પણ કર્યું હતું.
શ્રીલંકા પ્રવાસ દરમિયાન સિરાજની ગતિ અંગે ચિંતા દર્શાવવામાં આવી હતી. તેની ગતિ સામાન્ય રીતે 140 કિલોમીટર પ્રતિ કલાકની આસપાસ રહે છે, પરંતુ તે 120 કિલોમીટર પ્રતિ કલાક સુધી ઘટી ગઈ હતી. બે મેચની શ્રેણીમાં તેમણે 44 ઓવર બોલિંગ કરી અને ચાર વિકેટ લીધી.
દુલીપ ટ્રોફીની ફાઇનલ પછી ચેન્નઈમાં સિરાજે કહ્યું હતું, "બે મહિનાના વિરામ પછી સીધા મેચમાં ઉતરવાથી મારી લય પૂરી રીતે બની શકી ન હતી. હું સંપૂર્ણપણે લય પર નિર્ભર રહેનારો બોલર છું. જો હું લયમાં ન હોઉં તો ક્રીઝ પરથી પૂરી શક્તિ સાથે બોલ ફેંકી શકતો નથી." તેમણે ઉમેર્યું, "શ્રીલંકામાં પણ આ જ સમસ્યા હતી. કેટલાક પગલાં ખૂબ નાના અને કેટલાક ખૂબ લાંબા હતા. તેનાથી મારી લય તૂટી ગઈ અને ગતિ ઓછી થઈ ગઈ."
રણજી ટ્રોફી 2026-27 11 ઓક્ટોબર 2026થી 3 માર્ચ 2027 સુધી રમાશે. આ ટુર્નામેન્ટ બે લેગમાં રમાશે, જેમાં એલિટ ગ્રુપમાં 32 ટીમો અને પ્લેટ ગ્રુપમાં 6 ટીમો સામેલ છે.
BCCIની 2026-27ની ઘરેલુ સિઝનમાં કુલ 1,788 મેચ રમાશે. આ સિઝનની શરૂઆત દુલીપ ટ્રોફીથી થઈ હતી અને રણજી ટ્રોફી ઉપરાંત સૈયદ મુશ્તાક અલી ટ્રોફી અને વિજય હઝારે ટ્રોફી જેવી ટુર્નામેન્ટ્સનો પણ સમાવેશ થાય છે.