દિવાળી અને લગ્નોત્સવની ખરીદીની સીઝન શરૂ થઈ રહી છે, ત્યારે સોનું-ચાંદી ખરીદવા માગતા લોકો માટે રાહતના સમાચાર છે. ઈન્ડિયા બુલિયન એન્ડ જ્વેલર્સ એસોસિયેશન (IBJA)ના આંકડા મુજબ, એક કિલો ચાંદીના ભાવમાં ₹4,750નો ઘટાડો થયો છે અને તે ₹1.95 લાખ પર આવી ગઈ છે. ગુરુવારે ચાંદી ₹2 લાખ પર હતી.
લગભગ 10 મહિના પછી ચાંદી ફરી ₹2 લાખની નીચે આવી છે. આ પહેલાં 17 ડિસેમ્બર 2025ના રોજ ચાંદીનો ભાવ પહેલી વખત ₹2 લાખને પાર ગયો હતો.
બીજી તરફ, 10 ગ્રામ 24 કેરેટ સોનું ₹1,246 ઘટીને ₹1.41 લાખ પર આવ્યું છે. 22 ઓક્ટોબરે તેનો ભાવ ₹1.43 લાખ હતો.
છેલ્લા ચાર દિવસથી સતત ઘટાડાને કારણે સોનું ₹4,978 સસ્તું થયું છે, જ્યારે ચાંદીના ભાવમાં ₹15,891નો ઘટાડો થયો છે. 16 ઓક્ટોબરે સોનાની કિંમત ₹1.46 લાખ અને ચાંદીની કિંમત ₹2.10 લાખ હતી.
ઓલ ટાઇમ હાઈથી ચાંદી ₹1.85 લાખ ઘટી
આ વર્ષે સોના-ચાંદીના ભાવમાં સતત ઉતાર-ચઢાવ જોવા મળ્યો છે. 31 ડિસેમ્બર 2025ના રોજ ચાંદીનો ભાવ ₹2.30 લાખ હતો, જે 29 જાન્યુઆરીએ વધીને ₹3.86 લાખની ઓલ ટાઇમ હાઈ પર પહોંચ્યો હતો. ત્યારથી અત્યાર સુધીમાં ચાંદી ₹1.85 લાખ સસ્તી થઈ છે.
સોનાનો ભાવ 31 ડિસેમ્બર 2025ના રોજ ₹1.33 લાખ હતો, જે 29 જાન્યુઆરીએ વધીને ₹1.76 લાખની ઓલ ટાઇમ હાઈ પર પહોંચ્યો હતો. ત્યારથી અત્યાર સુધીમાં સોનું ₹35 હજાર સસ્તું થયું છે.
દરેક શહેરમાં સોનાના ભાવ અલગ કેમ?
એક જ દિવસે અલગ-અલગ શહેરોમાં સોનાના ભાવ અલગ હોય છે. તેના મુખ્ય ચાર કારણો છે —
વાહનવ્યવહાર અને સુરક્ષા: એક શહેરથી બીજા શહેરમાં સોનું લઈ જવામાં ઈંધણ અને સુરક્ષાનો ખર્ચ ઉમેરાય છે. અંતર વધે તેમ ભાવ પણ વધે છે.
ખરીદીનું પ્રમાણ: દક્ષિણ ભારતમાં સોનાનો વપરાશ વધુ (લગભગ 40%) હોવાથી જ્વેલર્સ મોટી ખરીદી કરે છે, પરંતુ તેનો લાભ ગ્રાહકને મર્યાદિત મળે છે.
સ્થાનિક જ્વેલરી એસોસિયેશન: રાજ્ય અને શહેરના જ્વેલરી એસોસિયેશન સ્થાનિક માંગ-પુરવઠાના આધારે દર નક્કી કરે છે.
જૂનો સ્ટોક અને ખરીદી કિંમત: જ્વેલર્સે જે દરે ખરીદી કરી હોય તે નક્કી કરે છે કે ગ્રાહકને કઈ કિંમતે વેચવું.
સોનું ખરીદતી વખતે બે બાબતો ધ્યાનમાં રાખો
સર્ટિફાઇડ સોનું જ ખરીદો: હંમેશાં બ્યુરો ઑફ ઇન્ડિયન સ્ટાન્ડર્ડ્સ (BIS)નું હોલમાર્ક ધરાવતું સોનું ખરીદો. હોલમાર્ક નંબર ઉદાહરણ તરીકે AZ4524 જેવો હોઈ શકે. હોલમાર્ક પરથી સોનું કેટલા કેરેટનું છે તે જાણી શકાય છે.
કિંમત ક્રોસ ચેક કરો: સોનાનું સાચું વજન અને ખરીદીના દિવસની કિંમત અનેક સ્રોતો (જેમ કે IBJAની વેબસાઇટ) પરથી ચકાસો. સોનાનો ભાવ 24, 22 અને 18 કેરેટ પ્રમાણે અલગ હોય છે.
અસલી ચાંદી ઓળખવાની ચાર રીતો
ચુંબકની કસોટી: અસલી ચાંદી ચુંબકને ચોંટતી નથી. ચોંટી જાય તો નકલી છે.
બરફની કસોટી: ચાંદી પર બરફ મૂકો, અસલી ચાંદી પર બરફ ઝડપથી પીગળે છે.
ગંધની કસોટી: અસલી ચાંદીમાં કોઈ ગંધ હોતી નથી. નકલી ચાંદીમાં તાંબા જેવી ગંધ આવે છે.
કાપડની કસોટી: ચાંદીને સફેદ કપડાથી ઘસો. કાળો ડાઘ પડે તો તે અસલી છે.