નવી દિલ્હી: વેસ્ટ ઇન્ડીઝ સામેની બીજી વન-ડેમાં શુભમન ગિલે બેવડી સદી ફટકારી હતી. તે પછી તેની ચર્ચા આખા દેશમાં થઈ રહી છે. હવે વેસ્ટ ઇન્ડીઝ સામેની ત્રીજી અને છેલ્લી વન-ડે પહેલા ગિલે વર્લ્ડ કપના શેડ્યૂલ વિશે વાત કરી છે.
ગુરુવારે વર્લ્ડ કપનું શેડ્યૂલ જાહેર થયું. ત્યાર બાદ ગિલે ઑફિશિયલ બ્રોડકાસ્ટર જિયો-સ્ટાર સ્પોર્ટ્સ સાથે વાત કરી. તેમાં તેને કેપ્ટન તરીકેની જવાબદારી, વર્લ્ડ કપ અને રોહિત શર્મા તથા વિરાટ કોહલી જેવા સિનિયર ખેલાડીઓ સાથે રમવાના અનુભવ વિશે ખુલીને વાત કરી.
ગિલે કહ્યું કે મેં ક્યારેય કેપ્ટન બનવાનું સપનું જોયું નહોતું. 'હું આને એક જવાબદારી તરીકે વધુ જોઉં છું. મોટા થતી વખતે મારું એવું કોઈ ખાસ સ્વપ્ન નહોતું કે મારે એક દિવસ ભારતનો કેપ્ટન બનવું છે. મારું સ્વપ્ન હંમેશા દેશ માટે રમવું અને મેચ જીતાડવાનું હતું. તેથી, જ્યારે મને કેપ્ટનશીપની આ તક મળી, તો સ્વાભાવિક રીતે આ એક મોટું સન્માન અને એક મોટી જવાબદારી હતી. હું આને એ રીતે જોઉં છું કે મને ટીમની જવાબદારી સોંપવામાં આવી છે. આનાથી મારા માટે વસ્તુઓ ખૂબ સરળ થઈ જાય છે. મને આ વાતનું બહુ દબાણ અનુભવતો નથી કારણ કે મને લાગે છે કે જો હું સાચી દાનતથી કામ કરું, તો બધું પોતાની જગ્યાએ બરાબર થઈ જશે.'
શુભમન ગિલને 2025માં ટેસ્ટની સાથે વન-ડેનો પણ કેપ્ટન બનાવ્યો છે.
2023 વર્લ્ડ કપની ફાઇનલમાં ઓસ્ટ્રેલિયા સામે ભારતને હાર મળી હતી. તે વિશે ગિલે કહ્યું, 'હા, આ અધૂરું કામ છે, જેને આપણે પૂરું કરવાનું છે. કારણ એ છે કે જે રીતે આપણે આખી ટુર્નામેન્ટમાં પ્રદર્શન કર્યું હતું, આપણે ટુર્નામેન્ટની સૌથી સારી ટીમ લાગી રહ્યા હતા. પરંતુ વર્લ્ડ કપ આવા જ હોય છે. બની શકે કે તમે આખી ટુર્નામેન્ટમાં તમામ મેચ જીતો અને પછી ફાઇનલમાં જઈને હારી જાઓ. આપણે જીતી ન શક્યા. એટલા માટે આ આપણું અધૂરું કામ છે.'
ગિલે વધુમાં કહ્યું, 'એક ખેલાડી તરીકે, તમને તમારા દેશનું પ્રતિનિધિત્વ કરવા માટે વર્લ્ડ કપમાં આટલી બધી તકો મળતી નથી. તેથી, તમે તમારા દેશ માટે જે પણ વર્લ્ડ કપ રમો છો, તે એક મોટું સન્માન હોય છે. એટલા માટે, વધુ એક વર્લ્ડ કપ રમવા માટે સક્ષમ બનવા પર હું ખૂબ આભારી છું.'
નંબર-1 બેટરના ટેગ વિશે પૂછતાં ગિલે કહ્યું, 'હું પહેલીવાર કદાચ 2023 વર્લ્ડ કપ દરમિયાન નંબર-1 બેટર બન્યો હતો. ત્યારે ખૂબ સારું લાગ્યું હતું. એક બાળક તરીકે તમે રેન્કિંગને જુઓ છો. તેથી આ એક એવો નિશાન લગાવવા જેવું હતું કે ચલો ઠીક છે, એકવાર મારે નંબર એક રેન્કિંગવાળો વન-ડે બેટર બનવું છે. તે સારું લાગે છે, પરંતુ હવે આનાથી બહુ ફરક નથી પડતો. મારા માટે, એ વધુ મહત્વનું છે કે જ્યારે તમે મેદાન પર ઉતરો છો, બેટિંગ કરવા જાઓ છો, તો તમે ટીમને કેવી રીતે જીતાડી શકો છો, તમારું યોગદાન કેવી રીતે આપી શકો છો.'
રોહિત શર્મા અને વિરાટ કોહલી સાથે રમવા વિશે ગિલે કહ્યું, 'હું મારી જાતને અત્યંત ભાગ્યશાળી અનુભવું છું. વિરાટ ભાઈ કદાચ દુનિયાના સૌથી સારા વન-ડે બેટર છે, અને રોહિત ભાઈ દુનિયાના સૌથી સારા વન-ડે ઓપનર છે. આ બંને ખેલાડીઓ અને તેમનો અનુભવ, તેમણે શેર કરેલી ક્ષણો ટીમમાં હોવી ખૂબ મોટી વાત છે. અમે ખરેખર ટીમમાં તેમનું હોવું પસંદ કરીએ છીએ. તેમનો અનુભવ અમારા માટે ખૂબ મૂલ્યવાન છે.'
બંને દિગ્ગજો પાસેથી સલાહ લેવા અંગે ગિલે કહ્યું, 'હું આ બંને પાસેથી જ નહીં, પરંતુ કે.એલ. રાહુલ અને શ્રેયસ અય્યર પાસેથી પણ સલાહ લઉં છું. મને બધાના અભિપ્રાય લેવાનું ગમે છે. પછી હું મારી જાતે વિચારું છું કે મારાથી શું રહી ગયું. મોટાભાગના સમયે એવું થાય છે કે જો તેઓ કંઈક સૂચન આપવા આવે છે, તો મેં તેના વિશે વિચારી રાખ્યું હોય છે. જો મેં તેના વિશે નથી વિચાર્યું, તો હું વિચારું છું કે તેમના વિચારો શું છે, તેમની સલાહ શું છે.'