ભારતીય ટી20 ટીમના કેપ્ટન શ્રેયસ અય્યરે બુધવારે ક્રાઇસ્ટચર્ચમાં પત્રકારો સાથે વાત કરતાં કહ્યું કે યુવા બેટર વૈભવ સૂર્યવંશીને હાલમાં પ્લેઇંગ-11માં સ્થાન મળવું મુશ્કેલ છે. તેમણે કહ્યું, “એવું નથી કે વૈભવ સૂર્યવંશી હમણાં સીધા ટીમમાં આવી શકે છે. અમારા ઓપનરો સતત રન બનાવી રહ્યા છે અને તેમણે વર્લ્ડ કપ જીત્યો છે.”
31 વર્ષીય અય્યરે ન્યૂઝીલેન્ડ સામેની પાંચ મેચની ટી20 સિરીઝ પહેલાં કહ્યું, “વૈભવને આગળ તકો મળશે. વિદેશમાં રમવાનો અનુભવ તેને ભવિષ્ય માટે તૈયાર કરશે.” ફોટોશૂટ બાદ તેમણે પત્રકારો સાથે વાતચીત કરી હતી.
અય્યરે વધુમાં જણાવ્યું કે વૈભવે ડ્રેસિંગ રૂમમાં ખુશ રહેવું જોઈએ. તે ખૂબ યુવા છે અને તેની પાસે તકો મેળવવા માટે ઘણાં વર્ષો છે.
ઇંગ્લેન્ડ અને આયર્લેન્ડ પ્રવાસ માટે પસંદગી થયા બાદથી વૈભવે 8 ટી20 મેચ રમી છે. તેણે 2 અડધી સદીની મદદથી 186.36ની સ્ટ્રાઇક રેટથી 246 રન બનાવ્યા છે. આ દરમિયાન નિયમિત ઓપનર અભિષેક શર્મા અને સંજુ સેમસન સતત સારું પ્રદર્શન કરતા રહ્યા છે.
શ્રેયસ અય્યરનું માનવું છે કે વિદેશી પરિસ્થિતિઓમાં વૈભવનો અનુભવ ભવિષ્યની સિરીઝ માટે તેમની તૈયારીને વધુ સારી બનાવશે. તેમણે કહ્યું, “જ્યારે તે વિદેશોમાં રમશે ત્યારે તેને આ ખાસ પીચ પર બેટિંગ કરવાનો સારો અંદાજ મળશે. આવતી વખત જ્યારે તે આ પરિસ્થિતિઓમાં આવશે ત્યારે તે સંપૂર્ણપણે તૈયાર હશે. તે પહેલી વાર અહીં આવનારા ટીમના અન્ય ખેલાડીઓને પણ સલાહ આપી શકશે.”
ઉલ્લેખનીય છે કે વૈભવને વેસ્ટ ઇન્ડિઝ સામેની 5 મેચની ટી20 સિરીઝમાં એક પણ તક મળી નહોતી. આ દરમિયાન વૈભવે 16 ઓક્ટોબરે “સ્ટિલ બિલીવિંગ” અને 13 ઓક્ટોબરે “સ્ટે સીટેડ” લખીને સ્ટેટસ મૂક્યા હતા.
વૈભવ સૂર્યવંશી સાથે જોડાયેલા બે નિવેદનો પણ ચર્ચામાં છે. પૂર્વ ભારતીય ક્રિકેટર વીરેન્દ્ર સેહવાગે કહ્યું છે કે 15 વર્ષના યુવા બેટર વૈભવ સૂર્યવંશીમાં તેમને પોતાની નિર્ભય બેટિંગની ઝલક જોવા મળે છે. સેહવાગે કહ્યું, “સૂર્યવંશી પહેલી જ બોલથી શોટ ફટકારવા માગે છે.” બીજી તરફ, ગયા મહિને મુખ્ય કોચ ગૌતમ ગંભીરે કહ્યું હતું કે ખેલાડીની ઉંમર 15 હોય કે 30 વર્ષ, જો તેને તકની રાહ જોવી હોય તો રાહ જોવી પડશે.
વૈભવ સૂર્યવંશીએ છેલ્લી ટી20 આંતરરાષ્ટ્રીય મેચ પાકિસ્તાન સામે રમી હતી. આ મેચમાં ભારતે 19 રનની જીત મેળવીને ગોલ્ડ મેડલ જીત્યો હતો. વૈભવ ઓવરઓલ ટી20 ક્રિકેટમાં 4 સદી ફટકારી ચૂક્યો છે.