મુંબઈના શિવાજી પાર્કમાં કોકરોચ જનતા પાર્ટી (CJP)ના સૂચિત પ્રદર્શનને લઈને વિવાદ વકર્યો છે. સ્થાનિક લોકો ઘોંઘાટ, ટ્રાફિક અને વિસ્તારની શાંતિ પર પડતી અસરને કારણે પ્રદર્શનનો વિરોધ કરી રહ્યા છે. બીજી તરફ, સિનિયર રાઈટર જાવેદ અખ્તરની સોશિયલ મીડિયા પોસ્ટ પર પણ ચર્ચા શરૂ થઈ છે.
જાવેદ અખ્તરે X પર લખ્યું કે તેમને ખુશી છે કે શિવાજી પાર્કના કેટલાક નિવાસીઓ ઘોંઘાટને લઈને સંવેદનશીલ થઈ રહ્યા છે અને અધિકારીઓ પાસે CJPનું પ્રદર્શન રદ કરવાની માંગ કરી રહ્યા છે. તેમણે એમ પણ લખ્યું કે તેમને આશા છે કે આ જ લોકો મહારાષ્ટ્રની કોઈપણ રાજકીય પાર્ટીના શિવાજી પાર્કમાં થનારા જલસા વખતે પણ આ જ રીતે અને એટલી જ મજબૂતીથી વાંધો નોંધાવશે.
શિવાજી પાર્કની આસપાસ રહેતા લોકોએ પ્રદર્શનનો વિરોધ કર્યો છે. સ્થાનિક લોકોનું કહેવું છે કે મોટા જમાવડાથી વિસ્તારની શાંતિ, ટ્રાફિક અને રોજિંદી જિંદગી પ્રભાવિત થાય છે. નિવાસીઓએ અધિકારીઓને આવેદનપત્ર આપીને પ્રદર્શનને રોકવા માટે કાર્યવાહીની માંગ કરી છે.
સોશિયલ મીડિયા પર એક યુઝરે જાવેદ અખ્તર પર કટાક્ષ કર્યો. યુઝરે જવાબ આપતા તેમની જૂની પોસ્ટનો ઉલ્લેખ કર્યો અને કહ્યું કે જો જાવેદે બહાદુર પાયલટ માટે મહાવીર ચક્રની માંગવાળી પોસ્ટ પહેલા ન કરી હોત, તો તેમને આ પોસ્ટ પછી મળનારી આલોચનાને લઈને ડર લાગતો. તેમણે એમ પણ લખ્યું કે જાવેદ 'બેલેન્સિંગ ગેમ' રમતા જાણે છે અને તેમની પાસેથી ઘણું શીખવાની જરૂર છે.
જાવેદ અખ્તરે યુઝર્સની ટિપ્પણીઓ પર કટાક્ષભર્યા જવાબ આપ્યા. એક યુઝરે તેમને 'ઈડિયટ' કહ્યા, જેના જવાબમાં જાવેદે લખ્યું કે તમારો સંદેશ જણાવે છે કે બાળપણમાં તમને કયા સંસ્કાર આપવામાં આવ્યા છે. બીજા એક યુઝરે દાવો કર્યો કે જાવેદને કદાચ ખબર જ નથી કે પ્રદર્શન કયા મુદ્દાને લઈને થઈ રહ્યું છે. તેમણે આરોપ લગાવ્યો કે તેમના માટે સરકાર વિરુદ્ધ થતું કોઈપણ પ્રદર્શન જ તેને રદ કરાવવાનું કારણ છે.
જાવેદે પ્રદર્શનને ચૂંટણી પંચના વિરોધ તરીકે ઓળખાવતા કહ્યું કે ચૂંટણી પંચ એક સ્વતંત્ર સંસ્થા હોવી જોઈએ અને તે સરકારનો ભાગ નથી. તેમણે સવાલ કર્યો કે ચૂંટણી પંચનો વિરોધ કરવો એ સરકારનો વિરોધ શા માટે માનવામાં આવી રહ્યો છે.
CJPએ 2 ઓક્ટોબરે મુંબઈના શિવાજી પાર્કથી પોતાનું 'જેલ ભરો આંદોલન' શરૂ કરવાનું એલાન કર્યું છે. સંગઠનના સ્થાપક અભિજીત દીપકેના જણાવ્યા મુજબ પ્રદર્શનનો મુખ્ય મુદ્દો મુખ્ય ચૂંટણી કમિશનર જ્ઞાનેશ કુમારના રાજીનામાની માંગ અને ચૂંટણી પ્રક્રિયા સાથે જોડાયેલા મુદ્દાઓ છે. CJPએ SIR એટલે કે મતદાર યાદીના વિશેષ ગહન પુનરીક્ષણને લઈને પણ સવાલો ઉઠાવ્યા છે. CJPએ સાંજે 4 વાગ્યે શિવાજી પાર્કના ગેટ નંબર 6 પર પ્રદર્શનની વાત કહી છે. જોકે, મુંબઈ પોલીસે પ્રદર્શનની પરવાનગી આપી નથી અને આયોજકોને બીજા સ્થળે પ્રદર્શન માટે અરજી કરવાની સલાહ આપવામાં આવી છે.