બોલિવૂડના જાણીતા અભિનેતા શક્તિ કપૂરે હાલમાં જ કપિલ શર્માના શોમાં પોતાના કરિયરની શરૂઆતનો એક રસપ્રદ કિસ્સો શેર કર્યો છે. તેમણે જણાવ્યું કે ફિલ્મ ઈન્ડસ્ટ્રીમાં પ્રવેશતા પહેલા જ એક દુકાનદારે તેમના સુપરસ્ટાર બનવાની ભવિષ્યવાણી કરી હતી અને પોતાની દુકાન પર તેમનું પોસ્ટર પણ લગાવ્યું હતું.
શક્તિ કપૂરે વાગોળ્યું કે, “રાત્રે જ્યારે હું મારા 3-4 મિત્રો સાથે પાનની દુકાન પર જતો, ત્યારે દુકાનદાર મને કહેતો, ‘તમે અહીં શું કરી રહ્યા છો? મુંબઈ જઈને એક્ટિંગમાં નસીબ અજમાવો, તમે ચોક્કસ સફળ થશો. જુઓ, મેં તો અત્યારથી જ તમારું પોસ્ટર લગાવી દીધું છે!’”
તેમણે ઉમેર્યું કે જ્યારે તેઓ ફિલ્મોમાં સફળ થયા અને લોકો તેમને ઓળખવા લાગ્યા, ત્યારે તેઓ તે દુકાનદારનો આભાર માનવા ખાસ ગયા હતા અને ભવિષ્યમાં કોઈપણ મદદ માટે ખાતરી આપી હતી.
શક્તિ કપૂરે 1977માં ફિલ્મ ‘ખેલ ખિલાડી કા’થી અભિનેતા તરીકે કરિયરની શરૂઆત કરી હતી. ચાર દાયકાથી વધુની સફરમાં તેમણે 700થી વધુ ફિલ્મોમાં કામ કર્યું છે. વિલનથી લઈને કોમેડિયન સુધીના વિવિધ પાત્રોમાં તેમણે પોતાની છાપ ઊભી કરી છે. ખાસ કરીને 1994ની ફિલ્મ ‘અંદાજ અપના અપના’માં તેમનું ‘ક્રાઈમ માસ્ટર ગોગો’નું પાત્ર અને તેનો સંવાદ “આંખે નિકાલ કે ગોટિયા ખેલૂંગા” આજે પણ યાદ કરવામાં આવે છે.