શાહરુખ ખાને મંગળવારે #AskSRK સેશનમાં ચાહકોના ઘણા પ્રશ્નોના જવાબ આપ્યા. તેણે 300 કરોડ રૂપિયાની કિંમતવાળા પોતાના ઘર ‘મન્નત’ના રિનોવેશન અને નવી ગેલેરી વિશે અપડેટ આપ્યું. એક ચાહકે મજાકમાં 'મન્નત' વેચવાની વાત કરી, તો શાહરુખે કહ્યું કે, નવી ગેલેરી બની રહી છે અને હવે તે ત્યાંથી જ ચાહકોને દેખાશે. તેણે ફિલ્મ ‘કિંગ’ની રિલીઝ ડેટ પણ કન્ફર્મ કરી.
શાહરુખ ખાન સોશિયલ મીડિયા દ્વારા ચાહકો સાથે જોડાયેલો રહે છે. મંગળવારે તેણે X (અગાઉ ટ્વિટર) પર #AskSRK સેશન કર્યું. એક ચાહકે તેની જાણીતી બાલ્કની વિશે મજાકમાં લખ્યું કે, જો તે ત્યાં આવીને ચાહકોનું અભિવાદન ન કરતા હોય, તો 'મન્નત' વેચી દેવી જોઈએ.
શાહરુખના જન્મદિવસ અને અન્ય ખાસ પ્રસંગોએ ચાહકો તેના ઘરની બહાર મોટી સંખ્યામાં એકઠા થાય છે. એક્ટર પણ 'મન્નત'ની બાલ્કનીમાંથી હાથ હલાવીને તેમનું અભિવાદન કરતો રહ્યો છે.
ચાહકના કમેન્ટ પર શાહરુખે પોતાની અનોખી શૈલીમાં જવાબ આપ્યો. તેણે કહ્યું કે, તે મન્નતમાં નવી ગેલેરી બનાવી રહ્યો છે અને હવે તે જ ગેલેરીમાંથી ચાહકોને દેખાશે. શાહરુખે લખ્યું, ‘હવે નવી ગેલેરી બનાવી રહ્યો છું ને, તો નવી ગેલેરી પર વધુ ચમકીશ. સાથે જ, આશા છે કે મારી પાસે પકડવા માટે કોઈ ટેકો પણ હશે.’
‘મન્નત’માં લાંબા સમયથી રિનોવેશનનું કામ ચાલી રહ્યું છે. આ જ કારણે શાહરુખ પોતાના 60મા જન્મદિવસ પર ઘરની બાલ્કનીમાં આવીને ચાહકોનું અભિવાદન કરી શક્યો નહોતો. તેણે સુરક્ષા કારણોનો હવાલો આપતા ચાહકોની માફી પણ માંગી હતી. એક્ટરના મતે, રિનોવેશન દરમિયાન તેના માટે નવી ગેલેરી તૈયાર કરવામાં આવી રહી છે.
#AskSRK સેશનમાં શાહરુખે પોતાની બહુપ્રતીક્ષિત ફિલ્મ 'કિંગ'ને લઈને ચાહકોને અપડેટ આપ્યું. તેણે સ્પષ્ટ કર્યું કે, ફિલ્મ 24 ડિસેમ્બર 2026ના રોજ જ રિલીઝ થશે. તેની રિલીઝ ડેટમાં કોઈ ફેરફાર કરવામાં આવ્યો નથી. એક ચાહકે ફિલ્મના ટ્રેલર અને અન્ય અપડેટ્સ વિશે પ્રશ્ન કર્યો તો શાહરુખે કહ્યું કે, ફિલ્મના રિલીઝમાં લગભગ 100 દિવસ બાકી છે. તેણે જણાવ્યું કે ફિલ્મ સાથે જોડાયેલા તમામ જરૂરી અપડેટ 24 ડિસેમ્બર પહેલા સામે આવશે.
શાહરુખે ફિલ્મના ડિરેક્ટર સિદ્ધાર્થ આનંદના વખાણ કરતા કહ્યું કે, ટીમ ફિલ્મને વધુ સારી બનાવવા માટે સમય લઈ રહી છે. તેનું કહેવું હતું કે, તે એવું કામ કરવા માંગે છે, જેને જોઈને દર્શકોને ખુશી થાય અને તેમને ‘કિંગ’ પર ગર્વ થાય. તેણે કહ્યું કે, 'અત્યારે માત્ર વાતચીત થશે, ટ્રેલર પછી આવશે.' એટલે કે ચાહકોને ફિલ્મના પ્રમોશનલ કન્ટેન્ટ માટે થોડી વધુ રાહ જોવી પડશે.
'કિંગ'માં શાહરુખ ખાન પહેલીવાર દીકરી સુહાના સાથે સ્ક્રીન શેર કરશે. આ ઉપરાંત અભિષેક બચ્ચન અને રાઘવ જુયાલ પણ મહત્ત્વની ભૂમિકામાં છે.
સિદ્ધાર્થ આનંદના ડિરેક્શનમાં બની રહેલી 'કિંગ'માં શાહરુખ ખાન લીડ રોલમાં છે. ફિલ્મમાં સુહાના ખાન, દીપિકા પાદુકોણ, અભિષેક બચ્ચન, જયદીપ અહલાવત, અભય વર્મા, રાઘવ જુયાલ અને અરશદ વારસી મહત્વની ભૂમિકાઓમાં જોવા મળશે. ફિલ્મનું નિર્માણ રેડ ચિલીઝ એન્ટરટેઈનમેન્ટ અને માર્ફ્લિક્સ પિક્ચર્સ કરી રહ્યા છે. 'કિંગ' 24 ડિસેમ્બર 2026ના રોજ સિનેમાઘરોમાં રિલીઝ થશે.