સપ્તાહના પ્રથમ દિવસે ભારતીય શેરબજારમાં ભારે ઘટાડો નોંધાયો હતો. સેન્સેક્સ 900થી વધુ પોઈન્ટ ગગડીને 72,981 પર અને નિફ્ટી 280 પોઈન્ટ ઘટીને 22,855 પર બંધ થયો હતો. આ ઘટાડાને કારણે રોકાણકારોના 6 લાખ કરોડ રૂપિયાથી વધુનું નુકસાન થયું છે.
બોમ્બે સ્ટોક એક્સચેન્જનો 30 શેરો ધરાવતો સેન્સેક્સ શુક્રવારના બંધ સ્તર 73,895 સામે 73,734 પર ખુલ્યો હતો, પરંતુ થોડી જ વારમાં 900થી વધુ પોઈન્ટ ગગડીને 72,981 પર આવી ગયો હતો. તે જ પ્રકારે નેશનલ સ્ટોક એક્સચેન્જનો નિફ્ટી ગત બંધ 23,140 સામે 23,065 પર ખુલ્યો હતો અને 23,000ના મહત્વપૂર્ણ સ્તરથી નીચે ગગડીને 22,855 પર ટ્રેડ થઈ રહ્યો હતો.
આ ઘટાડાના કારણે લાર્જ કેપથી લઈને સ્મોલકેપ સુધીના તમામ શેરો લાલ નિશાનમાં બંધ થયા હતા. BSEના લાર્જ કેપ સેગમેન્ટના તમામ 30 શેરો રેડ ઝોનમાં હતા. ખાસ કરીને HDFC Bank (1.90%), Kotak Bank (1.80%), SBI (1.60%), HUL (1.58%), Trent (1.56%), Bajaj Finance (1.40%), Reliance (1.35%) અને ICICI Bank (1.34%)ના શેરોમાં ભારે ઘટાડો નોંધાયો હતો. બેંકિંગ ઇન્ડેક્સ (BSE Bankex) 1.60% અને IT ઇન્ડેક્સ 1.10% ગગડ્યા હતા.
બજારમાં આ ઘટાડા પાછળ આંતરરાષ્ટ્રીય પરિબળો મુખ્ય જવાબદાર છે. અમેરિકા-ઈરાન શાંતિ વાર્તામાં ગતિરોધ યથાવત્ છે અને અમેરિકન પ્રમુખ ડોનાલ્ડ ટ્રમ્પે ઈરાની પ્રસ્તાવ ફગાવી દેતાં ક્રૂડ ઓઈલના ભાવમાં તેજી આવી છે. આ ઉપરાંત, વિદેશી સંસ્થાગત રોકાણકારો (FII) દ્વારા સતત કરવામાં આવી રહેલી જંગી વેચવાલી (શુક્રવારે રૂ. 3,600 કરોડથી વધુનું વેચાણ)ને કારણે પણ બજારનું સેન્ટિમેન્ટ નબળું પડ્યું છે.