સેહવાગે વૈભવ સૂર્યવંશીને ટેકો આપ્યો: 'ઉંમર નહીં, પ્રદર્શનથી ટીમમાં સ્થાન મળે'

પૂર્વ ભારતીય ક્રિકેટર વીરેન્દ્ર સેહવાગે 15 વર્ષના યુવા બેટર વૈભવ સૂર્યવંશીની બેટિંગ શૈલીની પ્રશંસા કરી છે. તેમણે કહ્યું કે સૂર્યવંશીમાં તેમની પોતાની નિર્ભય બેટિંગની ઝલક જોવા મળે છે. શનિવારે દિલ્હીમાં PHD ચેમ્બર ઑફ કોમર્સ એન્ડ ઇન્ડસ્ટ્રીના એક કાર્યક્રમમાં સેહવાગે આ વાત કહી.

સેહવાગે જણાવ્યું કે સૂર્યવંશી પહેલા જ બોલ પર શોટ મારવાનું પસંદ કરે છે. તેમણે કહ્યું, 'સૂર્યવંશી પહેલી જ બોલથી શોટ લગાવવા માગે છે.' તેમણે ઉમેર્યું કે ભારત માટે રમવાની તક મળે તો સૂર્યવંશી તેનો પૂરો લાભ ઉઠાવી શકે છે.

સેહવાગે એમ પણ કહ્યું કે ભારતીય ટીમમાં સ્થાન ઉંમરથી નહીં, પરંતુ પ્રદર્શનથી નક્કી થવું જોઈએ. તેમણે સૂર્યવંશીની ઉંમર અંગે ઊભી થતી ચિંતાઓને ફગાવી દીધી. તેમણે કહ્યું, 'જો તમે ઉંમર આધારિત સ્પર્ધામાં રમી રહ્યા હો, તો આ વાત સાચી છે. જો અંડર-19 હોય, તો તમારી ઉંમર 19 વર્ષથી ઓછી હોવી જોઈએ.'

વૈભવ સૂર્યવંશીએ જુલાઈ 2026માં ઇંગ્લેન્ડ સામે સિનિયર આંતરરાષ્ટ્રીય ક્રિકેટમાં ડેબ્યૂ કર્યું હતું. તે 15 વર્ષ અને 99 દિવસની ઉંમરે ભારતનો સૌથી નાની વયનો આંતરરાષ્ટ્રીય ક્રિકેટર બન્યો હતો. માન્ચેસ્ટરમાં રમાયેલી પ્રથમ T20 મેચમાં તેણે 10 બોલમાં 14 રન બનાવ્યા હતા, જેમાં તેની આક્રમક બેટિંગ જોવા મળી હતી, જોકે ભારત મેચ હારી ગયું હતું.

ત્યારબાદ સૂર્યવંશી ભારતની પ્લેઇંગ-11માં નિયમિત સ્થાન બનાવી શક્યો નથી. તે ટીમનો ભાગ છે, પરંતુ ટીમ કોમ્બિનેશન અને ઓપનિંગ સ્થાન માટે સેમસન સાથે સ્પર્ધા ચાલુ છે. તે વેસ્ટ ઇન્ડીઝ સામેની શરૂઆતની બે T20 મેચમાં પણ રમ્યો નહોતો.

સૂર્યવંશીએ એશિયન ગેમ્સની સેમિફાઇનલ અને ફાઇનલમાં ભાગ લીધો હતો. સેમિફાઇનલમાં શ્રીલંકા સામે 38 રન અને ફાઇનલમાં પાકિસ્તાન સામે 15 રન બનાવ્યા હતા. અત્યાર સુધીની T20 મેચોમાં તેણે 30.75ની સરેરાશ અને 186.36ના સ્ટ્રાઇક રેટથી 246 રન બનાવ્યા છે. તેનો શ્રેષ્ઠ સ્કોર 81 રન છે.