દેશની સૌથી મોટી સરકારી બેંક સ્ટેટ બેંક ઑફ ઇન્ડિયા (SBI)એ જુલાઈથી સપ્ટેમ્બર સુધીના બીજા ત્રિમાસિક ગાળાના પરિણામો જાહેર કર્યા છે. આ ત્રિમાસિકમાં બેંકને ₹23,038 કરોડનો ચોખ્ખો નફો થયો છે, જે ગયા વર્ષના આ જ સમયગાળા કરતાં આશરે 14% વધુ છે. ગયા વર્ષે આ જ ત્રિમાસિકમાં બેંકનો નફો ₹20,160 કરોડ હતો.
બેંકની મુખ્ય કમાણી લોકોને આપેલી લોન પર મળતા વ્યાજમાંથી થાય છે, જેને નેટ ઇન્ટરેસ્ટ ઇન્કમ (NII) કહેવામાં આવે છે. આ ત્રિમાસિકમાં બેંકની નેટ ઇન્ટરેસ્ટ ઇન્કમ ₹49,142 કરોડ થઈ છે, જે ગયા વર્ષના ₹42,847 કરોડ કરતાં આશરે 15% વધુ છે.
30 સપ્ટેમ્બર 2026 સુધીમાં બેંકે આપેલી કુલ લોન વાર્ષિક ધોરણે 7.84% વધીને 52 લાખ કરોડ રૂપિયા થઈ છે. બીજી તરફ, બેંકમાં જમા થયેલી કુલ રકમ 12.27% વધીને 63 લાખ કરોડ રૂપિયા થઈ છે. સેવિંગ્સ અને કરન્ટ એકાઉન્ટ (CASA)માં જમા રકમ 8.13% વધી છે અને કુલ જમા રકમમાં CASAનો હિસ્સો 38.3% રહ્યો છે. ફિક્સ્ડ ડિપોઝિટ (FD)માં 14.26%નો વધારો નોંધાયો છે.
બેંકની લોન વસૂલાતની સ્થિતિ પણ સુધરી છે. નેટ NPA ગુણોત્તર ઘટીને માત્ર 0.36% રહી ગયો છે, જે અગાઉના ત્રિમાસિકમાં 0.38% અને ગયા વર્ષે આ જ સમયગાળામાં 0.42% હતો. એટલે કે લોકોને આપેલી રકમ સમયસર પરત મળી રહી છે અને બેંકનું ફસાયેલું કરજ ઘટ્યું છે.
બજારના જાણકારોએ બેંકનો નફો આશરે ₹22,860 કરોડ રહેવાનું અનુમાન કર્યું હતું, પરંતુ વાસ્તવિક નફો તેનાથી વધુ રહ્યો છે. વિશ્લેષકોને નેટ ઇન્ટરેસ્ટ ઇન્કમમાં 11%થી 13% વધારાની અપેક્ષા હતી, જ્યારે તે 15% વધી છે. બ્રોકરેજ કંપનીઓએ લોન વિતરણમાં 17%થી 18% વૃદ્ધિનું અનુમાન વ્યક્ત કર્યું હતું, જે 7.84% રહી છે.
પરિણામો જાહેર થયા બાદ SBIનો શેર 1% વધીને ₹995 પર ટ્રેડ થયો હતો. એક મહિનામાં તેમાં 4% અને એક વર્ષમાં 5%નો વધારો થયો છે, જ્યારે છેલ્લા 6 મહિનામાં શેર 7% ઘટ્યો છે. બેંકનું માર્કેટ કેપ ₹9.15 લાખ કરોડ છે.
બ્રોકરેજ ફર્મોએ શેર ખરીદવાની સલાહ આપી છે. મોતીલાલ ઓસવાલે ₹1,370, ICICI સિક્યોરિટીઝે ₹1,300, એક્સિસ ડાયરેક્ટે ₹1,280 અને પ્રભુદાસ લીલાધરે ₹1,200નો ટાર્ગેટ આપ્યો છે.
SBI દેશની સૌથી મોટી સરકારી બેંક છે, જેમાં સરકારનો 55.5% હિસ્સો છે. તેની સ્થાપના 1 જુલાઈ 1955ના રોજ થઈ હતી અને મુખ્યાલય મુંબઈમાં છે. બેંકની 22,500થી વધુ શાખાઓ અને 50 કરોડથી વધુ ગ્રાહકો છે. તે વિશ્વના 29 દેશોમાં કાર્યરત છે અને ભારતની બહાર તેની 241 શાખાઓ છે.