મુંબઈમાં યોજાયેલા 13મા SBI બેન્કિંગ એન્ડ ઇકોનોમિક્સ કોન્કલેવ 2026માં પ્રધાનમંત્રીના પ્રિન્સિપાલ સેક્રેટરી ડૉ. પી.કે. મિશ્રાએ ભારતના આર્થિક ઉત્થાન અને ભવિષ્યની દિશા અંગે વિસ્તૃત માહિતી આપી. 'ફ્રોમ ઇમર્જિંગ ટુ લીડિંગ: ઇન્ડિયાઝ એક્સપાન્ડિંગ રોલ ઇન ધ ગ્લોબલ ઇકોનોમિક ઓર્ડર' વિષય પર બોલતા તેમણે જણાવ્યું કે ભારતની સફર માત્ર આર્થિક કદ વધારવાની નથી, પરંતુ એક મજબૂત સંસ્થાકીય પ્રક્રિયા છે.
ડૉ. મિશ્રાએ જણાવ્યું કે છેલ્લા દાયકામાં દેશની મેક્રોઇકોનોમિક સ્થિરતા, રાજકોષીય એકીકરણ, બેંકોની મજબૂત બેલેન્સ શીટ, ઇન્સોલ્વન્સી એન્ડ બેંકરપ્સી કોડ (IBC), જીએસટી (GST) અને ડિજિટલ પબ્લિક ઇન્ફ્રાસ્ટ્રક્ચર (DPI) જેવા સુધારાઓએ દેશને મજબૂત પાયો પૂરો પાડ્યો છે.
વૈશ્વિક આર્થિક આંચકાઓ વચ્ચે પણ મહામારી પછી ભારતીય અર્થતંત્ર વાસ્તવિક દ્રષ્ટિએ સરેરાશ 7 ટકાથી વધુના દરે વૃદ્ધિ પામ્યું છે, અને ચાલુ વર્ષના પ્રથમ ત્રિમાસિક ગાળામાં વિકાસ દર 7.8 ટકા રહ્યો છે. વૈશ્વિક બજારમાં ભારતની ભૂમિકા અંગે વાત કરતા ડૉ. મિશ્રાએ જણાવ્યું કે દેશ પાસે માત્ર એક મોટું બજાર હોવાનું પૂરતું નથી, પરંતુ હવે વૈશ્વિક સ્તરે એક મહત્ત્વપૂર્ણ ઉત્પાદન (મેન્યુફેક્ચરિંગ) અને ઇનોવેશન હબ બનવાની સુવર્ણ તક છે.
આ અર્થે તેમણે સૂચવ્યું કે ભારતે હવે 'મેક ઇન ઇન્ડિયાથી આગળ વધીને ડિઝાઇન ઇન્ડિયા, ઇનોવેટ ઇન્ડિયા અને લીડ ફ્રોમ ઇન્ડિયા'ના મંત્ર સાથે આગળ વધવું પડશે. ગ્લોબલ વેલ્યુ એડિશન, મજબૂત કમ્પોનન્ટ ઇકોસિસ્ટમ અને બૌદ્ધિક સંપદાના વિકાસ પર વિશેષ ભાર મૂકવાની જરૂર છે.
નાણાકીય ક્ષેત્રને ટકોર કરતા ડૉ. મિશ્રાએ જણાવ્યું કે હવે નાણાકીય પ્રણાલીએ માત્ર વૃદ્ધિને સમાવી લેવાને બદલે વૃદ્ધિને સક્ષમ બનાવવાની દિશામાં કામ કરવું પડશે. બેંકો અને નાણાકીય સંસ્થાઓએ પરંપરાગત 'કોલેટરલ (ગીરો)' આધારિત ધિરાણ પદ્ધતિથી આગળ વધીને 'કેશ ફ્લો' આધારિત મૂલ્યાંકન તરફ જવું જોઈએ. ટેકનોલોજી અને જીએસટી રિટર્ન, પેમેન્ટ ફ્લો જેવા ડિજિટલ ડેટાના માધ્યમથી પ્રથમ પેઢીના સાહસિકો અને નાના વ્યવસાયો (MSME)ને સરળતાથી ધિરાણ પૂરું પાડી શકાય છે.
ભવિષ્યના પડકારો અંગે બોલતા તેમણે આંતરરાષ્ટ્રીય સ્તરે ખંડિત વૈશ્વિક જોડાણો, વેપાર અવરોધો અને આર્ટિફિશિયલ ઇન્ટેલિજન્સ (AI)ના ઝડપી વિકાસથી પેદા થતા જોખમો સામે સચેત રહેવા આહ્વાન કર્યું. બેંકો ઉપરાંત ઊંડા કોર્પોરેટ બોન્ડ, ઇક્વિટી બજારો અને સ્થાનિક બચતને ઉત્પાદક રોકાણમાં રૂપાંતરિત કરવા જેવા પગલાં અનિવાર્ય છે.