અમરેલી જિલ્લાના ધારી તાલુકાના ગોવિંદપુર ગામની SBI બેંક શાખામાં બુધવારે એક યુવકે કુહાડી સાથે ઘૂસીને જમીનદોસ્તી કરી હતી. ગોલ્ડ લોનના ઘરેણાં છોડાવવાની માગ સાથે આવેલા યુવકે બેંકના દરવાજા, કાચ અને કમ્પ્યુટર સિસ્ટમ તોડી નાખતાં અંદાજે ₹2.30 લાખનું નુકસાન થયું છે. આ ઘટનામાં બેંક મેનેજરને નાની ઈજાઓ પણ થઈ છે.
ધારી પોલીસના જણાવ્યા મુજબ, ગોવિંદપુર ગામના શશીકાંત સતાસીયાએ બેંકમાંથી ગોલ્ડ લોન લીધી હતી. તેમના અવસાન બાદ તેમના પુત્ર સિદ્ધાર્થ સતાસીયાએ લોનની રકમ ભરીને સોનાના ઘરેણાં પરત મેળવવા માટે બેંકનો સંપર્ક કર્યો હતો. બેંક મેનેજર કુણાલ રાઠોડે જણાવ્યું કે કાયદાકીય નિયમ મુજબ તમામ વારસદારોની સહી જરૂરી છે. આરોપીની બહેન ઓસ્ટ્રેલિયામાં રહેતી હોવાથી સહી મેળવવામાં મુશ્કેલી પડતી હતી. આ બાબતે થયેલી ચર્ચા દરમિયાન યુવકે ઉગ્ર વર્તન કર્યું હતું.
ત્યારબાદ યુવક ઘરેથી કુહાડી લઈને બેંક પરિસરમાં ધસી આવ્યો હતો. તેણે ફરજ પરના મેનેજરને ગાળો આપી અને જાનથી મારી નાખવાની ધમકી આપી હતી. ઉશ્કેરાયેલા યુવકે કુહાડીથી બેંકના ચેમ્બરના દરવાજા, કાચ, વોશરૂમના પેસેજનો કાચ અને મુખ્ય દરવાજો તોડી નાખ્યો હતો. આ ઉપરાંત બેંકના બે કમ્પ્યુટર સિસ્ટમને પણ નુકસાન પહોંચાડ્યું હતું.
આરોપીએ બેંક મેનેજર પર પણ કુહાડી વડે હુમલો કરવાનો પ્રયાસ કર્યો હતો. બચાવ કરવા જતાં અને બાજુના કાચમાંથી બહાર નીકળતી વખતે મેનેજરના જમણા હાથમાં કાચ વાગતાં ઈજાઓ પહોંચી હતી. આ ઘટનાથી બેંક કર્મચારીઓમાં ભયનો માહોલ સર્જાયો હતો.
બ્રાન્ચ મેનેજર કુણાલ રાઠોડની ફરિયાદના આધારે ધારી પોલીસે આરોપી સિદ્ધાર્થ સતાસીયા વિરુદ્ધ ભારતીય ન્યાય સંહિતા (BNS) અને જાહેર મિલકતને નુકસાન પહોંચાડવાના અટકાવ અધિનિયમ (GP Act)ની વિવિધ કલમો હેઠળ ગુનો નોંધ્યો છે. પોલીસે આરોપીને પકડવા માટે અલગ-અલગ ટીમો બનાવીને તપાસ શરૂ કરી છે.
બેંકમાં ઘૂસીને કરાયેલા આ હુમલાએ બેંક કર્મચારીઓની સુરક્ષા સામે ગંભીર સવાલો ઊભા કર્યા છે. ગ્રાહકોની ફરિયાદો ઉકેલવા માટે બેંકે યોગ્ય પગલાં લેવા જોઈએ અને સુરક્ષા વ્યવસ્થા મજબૂત કરવી જોઈએ.