સ્ટેટ બૅંક ઑફ ઇન્ડિયા (SBI) એ 1 ઓક્ટોબરથી એટીએમમાંથી રોકડ ઉપાડવાના નિયમોમાં ફેરફાર કર્યો છે. બેઝિક સેવિંગ્સ બૅંક ડિપોઝિટ (BSBD) ખાતાધારકોને ચાર મફત ઉપાડ પછી દરેક ટ્રાન્ઝેક્શન પર 15 રૂપિયા અને તેના પર GST ચૂકવવો પડશે. બૅંકે આ માહિતી ઓગસ્ટ મહિનામાં જાહેર કરી હતી.
આ નિયમ મુખ્યત્વે એવા ગ્રાહકોને અસર કરશે જેમણે બૅંક શાખા દ્વારા BSBD ખાતું ખોલાવ્યું છે. બૅંકના નિયમ મુજબ, ગ્રાહકોને દર મહિને ચાર વખત મફતમાં રોકડ ઉપાડવાની સુવિધા મળે છે. આ મર્યાદા પૂરી થયા બાદ, દરેક વધારાના કેશ વિડ્રોલ પર 15 રૂપિયા અને તેના પર લાગુ GST ચાર્જ ચૂકવવો પડશે.
આધાર આધારિત પેમેન્ટ સિસ્ટમ (AePS) ના નિયમોમાં પણ ફેરફાર કરવામાં આવ્યો છે. અગાઉ, AePS ટ્રાન્ઝેક્શનને ડિજિટલ લેણ-દેણ ગણવામાં આવતું હતું અને તેને મહિનાની ચાર મફત વિડ્રોલ મર્યાદામાં ગણવામાં આવતું નહોતું. હવે SBIએ આ છૂટ પાછી ખેંચી લીધી છે, એટલે કે હવે AePS ટ્રાન્ઝેક્શનને પણ ગણવામાં આવશે. જોકે, ડિજિટલ ટ્રાન્ઝેક્શન પહેલાની જેમ જ મફત રહેશે અને તેની સંખ્યા પર કોઈ મર્યાદા રાખવામાં આવી નથી.
આ ઉપરાંત, SBIએ ઓગસ્ટ મહિનામાં 3 કરોડ રૂપિયા અને તેથી વધુની ડોમેસ્ટિક બલ્ક ફિક્સ્ડ ડિપોઝિટ પરના વ્યાજ દરોમાં પણ ફેરફાર કર્યા હતા, જે 15 ઓગસ્ટથી અમલમાં આવી ચૂક્યા છે.
નાણાકીય વર્ષ 2027ના પ્રથમ ત્રિમાસિક ગાળામાં SBIએ સારું પ્રદર્શન કર્યું છે. બૅંકના ચોખ્ખા નફામાં વાર્ષિક ધોરણે 10.23 ટકાનો વધારો નોંધાયો છે. એપ્રિલ-જૂન ક્વાર્ટરમાં બૅંકનો ચોખ્ખો નફો 21,121 કરોડ રૂપિયા રહ્યો છે, જ્યારે અગાઉના વર્ષના સમાન ગાળામાં આ આંકડો 19,160 કરોડ રૂપિયા હતો. બૅંકની વ્યાજમાંથી થતી આવક અને લોન વિતરણમાં થયેલા વધારાને કારણે આ સારો દેખાવ શક્ય બન્યો છે.
ગ્રાહકો માટે આ ફેરફાર 1 ઓક્ટોબરથી અમલમાં આવશે. તેથી, BSBD ખાતાધારકોએ પોતાના એટીએમ ઉપાડની યોજના બનાવતી વખતે આ નવા ચાર્જનું ધ્યાન રાખવું જરૂરી છે.