દેશભરની જાહેર ક્ષેત્રની બેંકોમાં 28થી 30 સપ્ટેમ્બર સુધી હડતાળ પડશે. તેને ધ્યાનમાં રાખીને SBIએ પોતાના ATMમાંથી રોકડ ઉપાડવા પર 3 દિવસ સુધી કોઈ ચાર્જ વસૂલવાનો નિર્ણય લીધો નથી. હડતાળ દરમિયાન બેંક શાખાઓ બંધ રહેશે, પરંતુ ડિજિટલ સેવાઓ ચાલુ રહેશે.
બેંક કર્મચારીઓ અઠવાડિયામાં 5 દિવસ કામ લાગુ કરવાની માંગ સાથે પ્રદર્શન કરી રહ્યા છે. તેમનું કહેવું છે કે સરકાર આ માંગ પર નિશ્ચિત તારીખ નક્કી ન કરે ત્યાં સુધી વિરોધ ચાલુ રહેશે. દેશની 7 મોટી બેંક યુનિયનો આ હડતાળમાં જોડાઈ છે, જેમાં AIBEA, AIBOC, NCBE, AIBOA, BEFI, INBEF અને INBOCનો સમાવેશ થાય છે. આ યુનિયનો દાવો કરે છે કે લગભગ 90% જેટલા બેંક કર્મચારીઓ હડતાળમાં સામેલ થશે.
હડતાળને કારણે સામાન્ય લોકોને પૈસા ઉપાડવા, ચેક ક્લિયરન્સ અને બીજા જરૂરી કામોમાં મુશ્કેલી ન પડે તે માટે નાણાં મંત્રાલયે રવિવાર, 27 સપ્ટેમ્બરે તમામ જાહેર ક્ષેત્રની અને પ્રાદેશિક ગ્રામીણ બેંકો ખુલ્લી રાખવાનો આદેશ આપ્યો છે.
બીજી તરફ, બેંકોમાં 5-દિવસના કાર્ય સપ્તાહને લઈને સરકાર અને યુનિયનો વચ્ચે મતભેદ છે. મીડિયા અહેવાલોમાં દાવો કરવામાં આવ્યો છે કે સરકારે ક્યારેય બેંકો માટે 5-દિવસના કાર્ય સપ્તાહનું વચન આપ્યું નહોતું અને પગાર સુધારણાની વાતચીત દરમિયાન પણ આ મુદ્દે ચર્ચા થઈ નહોતી. નાણાં મંત્રાલયના સૂત્રોના જણાવ્યા અનુસાર આ માંગ કર્મચારી યુનિયનો દ્વારા એકતરફી રીતે ઉઠાવવામાં આવી હતી અને બંને પક્ષો વચ્ચે તેના પર કોઈ સહમતિ થઈ નહોતી.
વધુમાં, બોનસ (PLI)ના નિયમોને લઈને પણ વિવાદ ચાલી રહ્યો છે. સરકારે સ્કેલ-4 અને તેનાથી ઉપરના અધિકારીઓ માટે નવો બોનસ નિયમ લાગુ કર્યો છે, જેમાં સારું કામ કરનારા અધિકારીઓને 365 દિવસના મૂળ પગાર જેટલું પ્રોત્સાહન કે બોનસ મળી શકે છે. બેંક યુનિયનો આ નિયમનો પણ વિરોધ કરી રહી છે.