યમનના તાઈઝ શહેરમાં સાઉદી અરેબિયાના વાયુસેનાએ હવાઈ હુમલો કર્યો છે. ઈરાન સમર્થિત હુથી બળવાખોરોના દાવા મુજબ, શહેરના મધ્યસ્થ જાહેર બજાર (સેન્ટ્રલ માર્કેટ) નજીક થયેલા આ હુમલામાં ઓછામાં ઓછા સાત નાગરિકોના મોત થયા છે અને બાળકો સહિત ડઝનબંધ લોકો ગંભીર રીતે ઘાયલ થયા છે.
હુથી પક્ષના 'અલ-મસીરા' ટીવી દ્વારા જાહેર કરાયેલા વીડિયોમાં બજારમાંથી ધુમાડાના ગોટા ઉડતા અને ખાદ્યસામગ્રીથી ભરેલા ગોડાઉન તબાહ થયેલા જોવા મળે છે. હુથી બળવાખોરોએ આરોપ લગાવ્યો છે કે સાઉદી વાયુસેનાએ જાણી જોઈને નાગરિક વિસ્તારોને નિશાન બનાવ્યા છે.
હુથી સૈન્ય પ્રવક્તા યાહ્યા સરીએ જણાવ્યું કે સાઉદી અરેબિયાએ નિર્દોષ લોકોનું લોહી વહાવ્યું છે. હુથી આરોગ્ય મંત્રાલયે આ હુમલાને નિર્દયી ગણાવીને ટૂંક સમયમાં સાઉદી અરેબિયા સામે વળતો પ્રહાર કરવાની ખુલ્લી ધમકી આપી છે.
બીજી તરફ, આંતરરાષ્ટ્રીય સ્તરે માન્યતા પ્રાપ્ત યમન સરકારે હુથીઓના દાવાને ફગાવી દીધો છે. સરકારી સૈનિકોના જણાવ્યા અનુસાર, વાયુસેનાએ માત્ર હુથી લડાયકોના સૈન્ય ડિપો અને વાહનોને નિશાન બનાવ્યા હતા, નાગરિક વિસ્તારોને નહીં.
તાઈઝ શહેર હાલ યમન સરકારના નિયંત્રણ હેઠળ છે, પરંતુ લાંબા સમયથી હુથી લડાયકોએ તેને ઘેરી રાખ્યું છે. સપ્ટેમ્બરમાં હુથી બળવાખોરોના નવા આક્રમણ બાદ દેશના અનેક ભાગોમાં યુદ્ધ વધુ તીવ્ર બન્યું છે. તાજેતરની હિંસાને કારણે અંદાજે 1,25,000 લોકો વિસ્થાપિત (બેઘર) થયા છે.
વર્ષ 2014થી ચાલી રહેલા આ ગૃહયુદ્ધ વચ્ચે યમન સરકારે નાગરિકોને સેના અને સુરક્ષા દળોમાં જોડાવા માટે સામાન્ય લામબંધી (જનરલ મોબિલાઈઝેશન)નું આહ્વાન કર્યું છે.