પાકિસ્તાનની T20 ટીમના નવા કેપ્ટન સાહિબઝાદા ફરહાને કહ્યું છે કે તેમની ટીમ શ્રીલંકા સામે આક્રમક ક્રિકેટ રમશે. આ મેચ શુક્રવારે સાંજે રાવલપિંડીમાં રમાશે.
મેચ પહેલાં પત્રકાર પરિષદમાં ફરહાને કહ્યું, 'કેપ્ટનશિપમાં દબાણ હોય છે. ઘરઆંગણે પહેલીવાર પાકિસ્તાનની કેપ્ટનશીપ કરવી મારા માટે સન્માનની વાત છે. નવા પડકાર માટે હું ઉત્સાહિત છું.'
ફરહાને 2026 T20 વર્લ્ડ કપમાં પાકિસ્તાનની કેપ્ટનશીપ કરનાર સલમાન અલી આગાની જગ્યા લીધી છે. સલમાનને 15 સભ્યોની ટીમમાં સ્થાન મળ્યું નથી.
ફરહાને કહ્યું કે તેમણે ક્યારેય વિચાર્યું નહોતું કે તેઓ પાકિસ્તાનના કેપ્ટન બનશે. તેમણે પિતાની દુઆનો ઉલ્લેખ કરતાં કહ્યું, 'માતા-પિતાની દુઆ ખરેખર કબૂલ થાય છે.'
નવા કેપ્ટનનું માનવું છે કે તેમણે આગળ વધીને નેતૃત્વ કરવું પડશે. તેઓ બેટથી સારું પ્રદર્શન કરીને સાથી ખેલાડીઓ માટે ઉદાહરણ બનવા માગે છે. તેમણે કહ્યું, 'મને વર્તમાન ટીમમાં પસંદ કરાયેલા ખેલાડીઓ પર સંપૂર્ણ વિશ્વાસ છે. સિનિયર ખેલાડીઓની હાજરી મેદાન પર મારી ઘણી મદદ કરશે.'
ફરહાને નેતૃત્વ પર સરફરાઝ અહમદના પ્રભાવની પણ વાત કરી. તેમણે કહ્યું, 'મેં સરફરાઝ અહમદની આગેવાનીમાં ઘણું રમ્યો છું. તેમની કેપ્ટનશીપ મને ખૂબ પસંદ હતી.'
પાકિસ્તાનના પૂર્વ કેપ્ટન બાબર આઝમ અને મોહમ્મદ રિઝવાનનું સમર્થન કરતાં ફરહાને કહ્યું, 'બાબર આઝમ અને મોહમ્મદ રિઝવાન વિશ્વના શ્રેષ્ઠ ખેલાડીઓ છે. બંને કોઈપણ સમયે T20 ક્રિકેટમાં વાપસી કરી શકે છે.'
પાકિસ્તાનની T20I ટીમ: સાહિબઝાદા ફરહાન (કેપ્ટન), અબ્દુલ સમદ, અબરાર અહમદ, અરાફાત મિનહાસ, ફખર ઝમાન, હસન નવાઝ, એમ ઇમરાન રંધાવા, ખ્વાજા નફે (વિકેટકીપર), માઝ સદાકત, નસીમ શાહ, રઝાઉલ્લાહ, સૈમ અયુબ, એમ સલમાન મિર્ઝા, શાદાબ ખાન, સુફિયાન મુકીમ.
શ્રીલંકાની T20I ટીમ: કુસલ મેન્ડિસ (કેપ્ટન), કામિલ મિશારા, સિનેથ જયવર્ધને, લાહિરુ ઉદારા, સહાન અરાચિગે, કામિન્દુ મેન્ડિસ, દાસુન શનાકા, ચામિન્દુ વિક્રમસિંઘે, દુનિથ વેલાલાગે, મહિશ થિક્સાના, વિજયકાંત વિયાસકાંત, દુષ્મંથા ચમીરા, બિનુરા ફર્નાન્ડો, નુવાન તુષારા, ઈશાન મલિંગા.