ભરૂચના સાગબારા વિસ્તારમાં જંગલ જમીનના ખેડાણ મુદ્દે શરૂ થયેલા આંદોલનને લઈને રાજકીય ચર્ચા તેજ બની છે. આંદોલનના પહેલા જ દિવસે સાંસદ મનસુખ વસાવા તેમાં જોડાયા ન હતા, જેને લઈને સવાલો ઉઠવા લાગ્યા હતા. જોકે, વસાવાએ તેમની ગેરહાજરી અંગે સ્પષ્ટતા કરી છે અને વિપક્ષ પર પ્રહારો પણ કર્યા છે.
મનસુખ વસાવાએ જણાવ્યું કે તેઓ ગાંધી જયંતિના કાર્યક્રમમાં વ્યસ્ત હોવાથી આંદોલનમાં જોડાઈ શક્યા નથી. તેમણે કોંગ્રેસ અને આમ આદમી પાર્ટીના નેતાઓ પર આકરા પ્રહારો કરતાં કહ્યું કે વિપક્ષના નેતાઓ માત્ર સ્ટંટબાજી કરી રહ્યા છે. તેમણે ભારપૂર્વક જણાવ્યું કે આ પ્રશ્નનો કાયમી ઉકેલ ફક્ત રાજ્ય સરકાર જ લાવી શકે છે. વસાવાએ ઉમેર્યું કે તેઓ સાગબારાના ખેડૂતોની જંગલ જમીન ખેડાણની ચિંતા સમયસર કરતા રહ્યા છે અને તેમની વતી સરકારમાં રજૂઆતો પણ કરી છે. આવનારા દિવસોમાં પણ ખેડૂતોને ન્યાય મળે તે માટે તેઓ પીછેહઠ નહીં કરે.
ઉલ્લેખનીય છે કે, આ પહેલા વનમંત્રી સામે આક્ષેપો કરનારા મનસુખ વસાવાના તાજેતરના નિવેદનથી ચર્ચા વધુ ઘેરી બની છે. જંગલ જમીનના ખેડાણનો મુદ્દો ફરી એકવાર રાજકીય ચર્ચાના કેન્દ્રમાં આવ્યો છે. સ્થાનિક સ્તરે આંદોલનને લઈને હલચલ વધી છે અને જમીનના ઉપયોગ તથા વન વિભાગ સાથે જોડાયેલા પ્રશ્નો લાંબા સમયથી ચર્ચામાં છે. હવે સૌની નજર રાજ્ય સરકારના નિર્ણય પર છે કે આ વિવાદનો શું ઉકેલ લાવવામાં આવે છે.