નર્મદા જિલ્લાના સાગબારામાં જંગલ જમીન વિવાદ ચાલુ છે. 24 સપ્ટેમ્બરે કેટલાક આદિવાસી ખેડૂતો ખેતી કરવા જંગલ જમીનમાં ગયા ત્યારે વન વિભાગે તેમને રોક્યા હતા. આ દરમિયાન ખેડૂતો અને વન વિભાગના કર્મચારીઓ વચ્ચે ઘર્ષણ થયું હતું. ખેડૂતોનું કહેવું છે કે વન વિભાગે સ્થાનિક વીડિયો બનાવનારને પણ ધમકાવ્યો હતો.
ઉલ્લેખનીય છે કે થોડા દિવસ પહેલા જ ભાજપના બે મંત્રીઓ અને સાંસદે આંદોલનકારીઓ સાથે વાત કરીને 90 દિવસમાં જંગલ જમીન મામલે સકારાત્મક નિર્ણયની ખાતરી આપી હતી. 23 દિવસ ચાલેલા આંદોલનને 31 ઓગસ્ટે પારણે કરાવવામાં આવ્યું હતું. વનમંત્રીએ કહ્યું હતું કે પેન્ડિંગ દાવા અરજીઓ પર 90 દિવસમાં સનદ મળશે. પરંતુ ખેડૂતોનું કહેવું છે કે આશ્વાસન પછી પણ વન વિભાગ તેમને ખેતી કરવા દેતું નથી.
ખેડૂતોનું કહેવું છે કે 'આદિવાસી પટ્ટા પર ભાજપના શાસનમાં ઘોર અન્યાય થઈ રહ્યો છે. સરકાર આદિવાસી સમાજ પ્રત્યે ભેદભાવ કરી રહી છે. આદિવાસી ખેડૂતો તેમના હક માટે તડપી રહ્યા છે. ભાજપના કેટલાક આગેવાનોએ જંગલની જમીન પચાવી પાડી છે તેની તપાસ થવી જોઈએ.'
આ મુદ્દે વન વિભાગનું કહેવું છે કે તેઓ કાયદા મુજબ કાર્યવાહી કરી રહ્યા છે. જમીનના દાવા અંગેની પ્રક્રિયા ચાલુ છે.