રશિયા અને યુક્રેન વચ્ચે ચાલી રહેલા યુદ્ધમાં હુમલાઓ ફરી તીવ્ર બન્યા છે. રશિયાએ યુક્રેનના શહેર ડનિપ્રો પર મોટો મિસાઇલ હુમલો કર્યો, જેના કારણે શહેર આગ અને ધુમાડાના વાદળોથી ઘેરાયેલું હતું. આ હુમલો તેના બે દિવસ પહેલા યુક્રેન દ્વારા મૉસ્કો પ્રદેશ પર કરાયેલા અત્યાર સુધીના સૌથી મોટા ડ્રોન હુમલાના જવાબમાં કરાયો હોવાનું મનાય છે.
મૉસ્કોના મેયર સર્ગેઈ સોબ્યાનિનના જણાવ્યા અનુસાર, રાજધાની તરફ આવી રહેલા આશરે 450 ડ્રોનને તોડી પાડવામાં આવ્યા હતા. આ હુમલામાં એક મુખ્ય તેલ રિફાઇનરી અને રહેણાંક મકાનને નિશાન બનાવવામાં આવ્યું હોવાનું કહેવાય છે.
મૉસ્કો પ્રદેશના ગવર્નર આન્દ્રે વોરોબ્યોવે જણાવ્યું કે ડ્રોન હુમલામાં ઓછામાં ઓછા બે લોકો માર્યા ગયા છે અને 20 ઘાયલ થયા છે. રવિવારે સોફિનોમાં ત્રણ માળની રહેણાંક ઇમારત પર ડ્રોનથી હુમલો થયો હતો, જેમાં 44 વર્ષીય મહિલાનું મોત થયું હતું. બે બાળકો સહિત પાંચ અન્ય ઘાયલ થયા હતા. ઓરેખોવો-ઝુએવો જિલ્લામાં એક ઘર પર થયેલા હુમલામાં એક વૃદ્ધ વ્યક્તિનું મોત થયું હતું. સોશિયલ મીડિયા પર આવેલા એક વીડિયોમાં મૉસ્કોના રાત્રિના આકાશમાં વિસ્ફોટ અને સળગતા વેરહાઉસના દ્રશ્યો જોવા મળ્યા હતા.
મેયર સોબ્યાનિને જણાવ્યું કે રાજધાનીમાં એક મુખ્ય બુલેવાર્ડ નજીક સ્થિત ઇમારત પર ડ્રોનથી હુમલો થયો હતો. યુક્રેનિયન લશ્કરી અધિકારીઓના જણાવ્યા અનુસાર, આ હુમલાથી મૉસ્કોની ઓઇલ રિફાઇનરીના ત્રણ મુખ્ય એકમોને નુકસાન થયું હતું. કિવ સંરક્ષણ મંત્રાલયના જણાવ્યા અનુસાર, આ રિફાઇનરી મૉસ્કો પ્રદેશના ત્રીજા ભાગ કરતાં વધુ ઇંધણ પૂરું પાડે છે. અહીં ઉત્પાદિત ગેસોલિન, ડીઝલ અને ઉડ્ડયન ઇંધણનો કેટલોક ભાગ રશિયન સૈન્યને પણ જાય છે.
બીજી તરફ, યુક્રેનિયન અધિકારીઓએ જણાવ્યું કે શનિવારે કિવ અને સુમી પ્રદેશોમાં રશિયન હુમલામાં ત્રણ બાળકો સહિત નવ લોકો માર્યા ગયા હતા.
સોબ્યાનિને મૉસ્કોમાં થયેલા હુમલાને રશિયાની સંસદીય ચૂંટણીઓને વિક્ષેપિત કરવાનો પ્રયાસ ગણાવ્યો હતો. રવિવાર ચૂંટણીનો ત્રીજો દિવસ હતો. ચૂંટણીઓ ક્રેમલિન દ્વારા કડક રીતે નિયંત્રિત હોવાનું કહેવાય છે અને ટીકાકારો તેને મુક્ત, ન્યાયી કે પારદર્શક માનતા નથી. રશિયન રાજ્ય મીડિયાએ અહેવાલ આપ્યો છે કે રવિવારે યુક્રેનના રશિયા-નિયંત્રિત ખેરસન પ્રદેશમાં બસ પર થયેલા ડ્રોન હુમલામાં માર્યા ગયેલા બે લોકોમાં એક ચૂંટણી અધિકારીનો પણ સમાવેશ થાય છે.
છેલ્લા એક અઠવાડિયામાં રશિયા અને યુક્રેન બંનેએ ઊર્જા અને પરિવહન માળખા તેમજ મુખ્ય લોજિસ્ટિક્સ કેન્દ્રોને નિશાન બનાવ્યા છે. અમેરિકાના રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર દાવો કર્યો હતો કે બંને પક્ષો ઊર્જા માળખા પર હુમલો ન કરવા સંમત થયા છે, તે પછી પણ આ વલણ ચાલુ છે.