રશિયા અને નાટો (NATO) વચ્ચે તણાવ વધી રહ્યો છે. રશિયાએ નાટોને ચેતવણી આપી છે કે જો પશ્ચિમી દેશો કાલિનિનગ્રાડને રશિયાના બાકીના ભૂભાગથી અલગ પાડવાનો પ્રયાસ કરશે, તો મોસ્કો પોતાની પાસે ઉપલબ્ધ તમામ લશ્કરી ક્ષમતાનો ઉપયોગ કરવા તૈયાર રહેશે. તેમાં પરમાણુ હથિયારોનો પણ સમાવેશ થાય છે.
અહેવાલ મુજબ, રશિયાએ નાટોને એક અનૌપચારિક રાજદ્વારી દસ્તાવેજ મોકલ્યો છે. આ દસ્તાવેજમાં નાટો પર ‘ખતરનાક અને બેદરકારીભર્યો માર્ગ’ અપનાવવાનો આરોપ મૂકવામાં આવ્યો છે. મોસ્કોએ ચેતવણી આપી છે કે આવી સ્થિતિ સીધા લશ્કરી સંઘર્ષનું જોખમ વધારી શકે છે.
કાલિનિનગ્રાડ રશિયાનો મહત્ત્વનો સૈન્ય વિસ્તાર છે, જે બાલ્ટિક સમુદ્રના કિનારે આવેલો છે અને પોલેન્ડ તથા લિથુઆનિયા વચ્ચે સ્થિત છે. રશિયાના બાકીના ભૂભાગથી અલગ આવેલા આ વિસ્તારને લઈને નાટો સાથે લાંબા સમયથી વ્યૂહાત્મક તણાવ છે.
રશિયાના દસ્તાવેજમાં કહેવામાં આવ્યું છે કે જો નાટો દેશો કાલિનિનગ્રાડને રશિયાના બાકીના દેશથી અલગ પાડવાનો કોઈ પ્રયાસ કરશે, તો રશિયા પોતાના પ્રદેશની રક્ષા માટે ઉપલબ્ધ તમામ દળો અને ક્ષમતાનો ઉપયોગ કરવા તૈયાર રહેશે. તેમાં પરમાણુ હથિયારોનો પણ સમાવેશ કરવામાં આવ્યો છે. રશિયાએ જોકે એવું પણ કહ્યું છે કે નાટોના સભ્ય દેશો પર હુમલો કરવાનો તેનો કોઈ ઇરાદો નથી. પરંતુ કાલિનિનગ્રાડ સામે કોઈ આક્રમક કાર્યવાહી થશે તો તેનો સૌથી કડક જવાબ આપવામાં આવશે.
નાટોની પ્રવક્તા એલિસન હાર્ટે રશિયા દ્વારા મોકલવામાં આવેલા અનૌપચારિક દસ્તાવેજની પુષ્ટિ કરી છે, પરંતુ તેની વિગતો જાહેર કરી નથી. તેમણે કહ્યું કે નાટો એક રક્ષણાત્મક સંગઠન છે અને તેની કોઈ પણ પ્રવૃત્તિ કે લશ્કરી કવાયત રશિયાના કોઈ વિસ્તાર માટે જોખમ ઊભું કરતી નથી. નાટોએ પરમાણુ હથિયારોના ઉપયોગની ધમકીને બિનજવાબદાર ગણાવી છે અને રશિયાને યુક્રેનમાં ચાલી રહેલું યુદ્ધ બંધ કરવાની અપીલ કરી છે.
રશિયાની આ ચેતવણી એવા સમયે આવી છે જ્યારે યુરોપીય દેશો મોસ્કો પર ‘હાઇબ્રિડ વોર’ દ્વારા તણાવ વધારવાનો આરોપ લગાવી રહ્યા છે. તેમાં તોડફોડ અને આગચંપી જેવી ઘટનાઓનો પણ સમાવેશ થાય છે. રશિયા આવા આરોપોને નકારે છે. એક યુરોપીય સંરક્ષણ અધિકારીએ કહ્યું કે શીત યુદ્ધ પછી પહેલી વખત રશિયા તરફથી આ પ્રકારની સીધી ચેતવણી મળી છે, તેથી આ સ્થિતિ ગંભીર છે. નાટોના એક રાજદ્વારીએ રશિયાના પત્રને યુરોપીય દેશોને ડરાવવાનો વધુ એક પ્રયાસ ગણાવ્યો અને કહ્યું કે નાટો યુક્રેનને સમર્થન આપવાથી પાછળ નહીં હટે.