અમેરિકાના વિદેશ મંત્રી માર્કો રૂબિયો 17 થી 22 ઓક્ટોબર દરમિયાન ભારતની મુલાકાતે આવશે. તેઓ ઉઝબેકિસ્તાનની મુલાકાત પૂરી કરીને સીધા ભારત આવશે અને મુંબઈ તેમજ ગુજરાતના જામનગર જશે. આ મુલાકાત દરમિયાન ભારતીય અધિકારીઓ અને ઉદ્યોગજગતના અગ્રણીઓ સાથે વ્યૂહાત્મક ભાગીદારી અને ઊર્જા ક્ષેત્રે સહયોગ વધારવા પર ચર્ચા થશે.
અમેરિકી વિદેશ વિભાગના સત્તાવાર નિવેદન મુજબ, ભારત આવતાં પહેલાં રૂબિયો ઉઝબેકિસ્તાનના સમરકંદ જશે, જ્યાં તેઓ 'C5+1 મિનિસ્ટ્રિયલ મીટિંગ'માં ભાગ લેશે. આ બેઠકમાં મધ્ય એશિયાના પાંચ દેશો – ઉઝબેકિસ્તાન, કઝાકિસ્તાન, તજાકિસ્તાન, તુર્કમેનિસ્તાન અને કિર્ગિસ્તાનના વરિષ્ઠ અધિકારીઓ સાથે દ્વિપક્ષીય ચર્ચા થશે. ત્યાર બાદ તેઓ સીધા ભારત આવશે. આ વર્ષે તેમની આ બીજી ભારત મુલાકાત હશે.
ગુજરાત અને મુંબઈ પ્રવાસ દરમિયાન રૂબિયો ભારત સરકારના વરિષ્ઠ અધિકારીઓ અને અગ્રણી ઉદ્યોગપતિઓને મળશે. આ બેઠકોમાં ભારત-અમેરિકા વચ્ચે વેપારી રોકાણ, આર્થિક સહયોગ અને ખાસ કરીને ઊર્જા ક્ષેત્રે સહકાર વધારવા અંગે વિગતવાર ચર્ચા થશે. જામનગર વિશ્વના રિફાઇનિંગ હબ તરીકે જાણીતું હોવાથી ઊર્જા અને વેપારની દૃષ્ટિએ આ મુલાકાતને ખૂબ મહત્ત્વની ગણવામાં આવે છે.
આ મુલાકાત એવા સમયે થઈ રહી છે જ્યારે અમેરિકામાં મિડટર્મ ચૂંટણીઓ નજીક છે અને રાષ્ટ્રપતિ ડોનાલ્ડ ટ્રમ્પની સરકાર ઇમિગ્રેશન નીતિઓ વધુ કડક બનાવી રહી છે. ભારતીય નાગરિકો માટે વીઝા સંબંધી કેટલાક પડકારોના કારણે બંને દેશો વચ્ચે કંઈક અંશે તણાવ પણ જોવા મળ્યો છે. જોકે, તાજેતરમાં ભારતમાં અમેરિકી રાજદૂત સર્જ્યો ગોરે રક્ષા, આઈટી અને હેલ્થકેર ક્ષેત્રે બંને દેશો વચ્ચે વધી રહેલા સહયોગ પર ભાર મૂક્યો છે. ભારતમાં યોજાયેલી 'તરંગ શક્તિ' કવાયત અને રાજસ્થાનમાં F-35 લડાકુ વિમાનોની તૈનાતી જેવા મુદ્દા બંને દેશોના સંરક્ષણ સંબંધોની મજબૂતી દર્શાવે છે. ગુજરાતની ધરતી પર થનારી આ ઉચ્ચસ્તરીય મુલાકાત ભારત-અમેરિકાના દ્વિપક્ષીય સંબંધોને નવી દિશા આપે તેવી સંભાવના છે.