જામનગરમાં વડાપ્રધાન નરેન્દ્ર મોદીના જન્મદિવસ નિમિત્તે એક ભજન સંધ્યા યોજાઈ હતી. આ કાર્યક્રમ ગઈકાલે સાંશે ડી.કે.વી. કોલેજ ખાતે યોજાયો હતો. કાર્યક્રમમાં શિક્ષણ રાજ્યમંત્રી રિવાબા જાડેજાએ ભક્તિભાવપૂર્વક ભજનો ગાયાં અને નૃત્ય કર્યું હતું.
વડાપ્રધાનના જન્મદિવસ અને મુખ્યમંત્રી તથા પ્રધાનમંત્રી તરીકેના તેમના 25 વર્ષના રાષ્ટ્રસેવાના કાર્યકાળની ઉજવણી નિમિત્તે આ વિશેષ કાર્યક્રમનું આયોજન કરવામાં આવ્યું હતું. ભજન અને કૃષ્ણભક્તિના સંગીતથી સમગ્ર વાતાવરણ ભક્તિમય બની ગયું હતું.
શિક્ષણ રાજ્યમંત્રી રિવાબા જાડેજાનું કૃષ્ણભક્તિથી ભરેલું સ્વરૂપ જામનગરના લોકોને પહેલીવાર જોવા મળ્યું. ભજનની ધૂન સાથે તેઓ ભક્તિમાં લીન થઈ ગયા હતા. તેમણે ભક્તિભાવપૂર્વક નૃત્ય કરીને પોતાની શ્રદ્ધા વ્યક્ત કરી હતી. તેમના આ ભાવસભર સ્વરૂપથી હાજર રહેલા લોકોમાં પણ ભક્તિ અને ઉત્સાહનો માહોલ છવાઈ ગયો હતો.
રિવાબા જાડેજા ભજન ગાયક સાથે મંચ પર પહોંચ્યા હતા. તેમણે ભજન ગાઈને કૃષ્ણ પ્રત્યેની પોતાની શ્રદ્ધા વ્યક્ત કરી હતી. ત્યારબાદ ગાયક સાથે તાલ મિલાવીને નૃત્ય કરતા તેમનું આ ભક્તિમય સ્વરૂપ કાર્યક્રમનું ખાસ આકર્ષણ બન્યું હતું. હાજર રહેલા લોકોએ રિવાબા જાડેજાના આ ભક્તિભાવના દ્રશ્યને ઉત્સાહપૂર્વક વધાવી લીધું હતું. રિવાબાએ સેલ્ફી વીડિયો પણ ઉતાર્યો હતો.
વડાપ્રધાનના જન્મદિવસ નિમિત્તે 'આશીર્વાદનો દીવડો' પ્રગટાવીને સ્નેહ, સંકલ્પ અને કૃતજ્ઞતાની લાગણી વ્યક્ત કરવામાં આવી હતી. 25 વર્ષના જાહેર જીવન અને રાષ્ટ્રસેવાના કાર્યકાળને બિરદાવતા આ કાર્યક્રમમાં ભક્તિ, સંસ્કૃતિ અને સામાજિક એકતાનો સંગમ જોવા મળ્યો હતો. જેમાં જિલ્લાના પ્રભારી ધનસુખ ભંડેરી, મેયર મોનિકાબેન વ્યાસ સહિત ભાજપના કોર્પોરેટરો, મહિલા આગેવાનો અને કાર્યકરો હાજર રહ્યા હતા.
મોટી સંખ્યામાં નગરજનો પણ ઉપસ્થિત રહ્યા હતા. ખાસ કરીને મહિલાઓ અને યુવતીઓની મોટી હાજરીએ કાર્યક્રમને વધુ આકર્ષક બનાવ્યો હતો. ડી.કે.વી. કોલેજના પરિસરમાં યોજાયેલા આ કાર્યક્રમમાં મહિલાઓ અને યુવતીઓની મોટી સંખ્યામાં ભાગીદારી જોવા મળી હતી. આનાથી નારીશક્તિના દર્શન થયા હતા. એક તરફ કૃષ્ણભક્તિના ભજનો અને બીજી તરફ રિવાબા જાડેજાનું ઉત્સાહભર્યું નૃત્ય તથા ગાયન, આ સમગ્ર માહોલે કાર્યક્રમને યાદગાર બનાવી દીધો હતો.