રેલવે મંત્રાલય હેઠળ કાર્યરત જાહેર ક્ષેત્રની કંપની રાઇટ્સ લિમિટેડ (RITES) એ આસિસ્ટન્ટ મેનેજર (મિકેનિકલ)ની કુલ 27 જગ્યાઓ માટે ભરતી જાહેર કરી છે. મિકેનિકલ એન્જિનિયરિંગનો અભ્યાસ પૂરો કરનારા ઉમેદવારો માટે આ એક તક છે.
આ ભરતી માટે ઓનલાઈન અરજીની પ્રક્રિયા 30 ઓક્ટોબર 2026થી શરૂ થઈ ગઈ છે. અરજી કરવાની છેલ્લી તારીખ 20 નવેમ્બર 2026 છે. ઉમેદવારો રાઇટ્સની સત્તાવાર વેબસાઇટ www.rites.com પરથી અરજી કરી શકે છે.
જગ્યાઓની વિગત
આસિસ્ટન્ટ મેનેજર મિકેનિકલ-1: 14 જગ્યાઓ
આસિસ્ટન્ટ મેનેજર મિકેનિકલ-2: 10 જગ્યાઓ
આસિસ્ટન્ટ મેનેજર મિકેનિકલ-3: 3 જગ્યાઓ
શૈક્ષણિક લાયકાત અને અનુભવ
ત્રણેય પદો માટે મિકેનિકલ એન્જિનિયરિંગમાં ડિપ્લોમા સાથે 8 વર્ષનો અનુભવ અથવા BE/B.Tech ડિગ્રી સાથે 2 વર્ષનો અનુભવ જરૂરી છે. જોકે, ઉમેદવારોએ અરજી કરતાં પહેલાં સત્તાવાર નોટિફિકેશનમાં દર્શાવેલી લાયકાત અને અનુભવની વિગતો ધ્યાનથી તપાસવી જરૂરી છે.
ઉમેદવાર પસંદગીમાં સ્ટીલ પ્લાન્ટ, રોલિંગ, ફોર્જિંગ અથવા કાસ્ટિંગ ઉદ્યોગમાં કામ કરવાનો અનુભવ ધરાવતા ઉમેદવારોને પ્રાથમિકતા મળી શકે છે.
ઉંમર મર્યાદા
સામાન્ય કેટેગરીના ઉમેદવારોની ઉંમર 18થી 40 વર્ષ વચ્ચે હોવી જોઈએ. અનામત કેટેગરીના ઉમેદવારોને સરકારી નિયમો મુજબ છૂટછાટ મળશે. SC/ST ઉમેદવારોને 5 વર્ષ, OBC નોન-ક્રીમી લેયર ઉમેદવારોને 3 વર્ષ અને PwBD ઉમેદવારોને 10 વર્ષ સુધીની છૂટછાટ આપવામાં આવશે. ઉંમરની ગણતરી 20 નવેમ્બર 2026ના આધારે કરવામાં આવશે.
અરજી કેવી રીતે કરવી
સૌપ્રથમ www.rites.com પર જાઓ. ત્યારબાદ Career વિભાગમાં જઈને આસિસ્ટન્ટ મેનેજર ભરતી માટેની On Line Registration લિંક પસંદ કરો. નામ, ઈમેલ આઈડી અને મોબાઈલ નંબર આપીને રજિસ્ટ્રેશન કરો. પછી શૈક્ષણિક લાયકાત અને કામના અનુભવની વિગતો સાથે અરજી ફોર્મ ભરો.
જરૂરી દસ્તાવેજો, ફોટો, સહી અને અનુભવ પ્રમાણપત્ર અપલોડ કરો. ડેબિટ કાર્ડ, ક્રેડિટ કાર્ડ અથવા નેટ બેન્કિંગ દ્વારા અરજી ફી ચૂકવો. ફોર્મમાં ભરેલી તમામ વિગતો ફરી એક વાર તપાસીને ફોર્મ સબમિટ કરો. અંતમાં કન્ફર્મેશન પેજ ડાઉનલોડ કરીને તેની પ્રિન્ટ સાચવી રાખો.