દિવંગત અભિનેતા ઋષિ કપૂરની આજે 74મી જન્મજયંતિ છે. તેમના પુસ્તક ‘ખુલ્લમ ખુલ્લા’માં તેમણે પોતાના જીવનના ઘણા કિસ્સાઓ શેર કર્યા છે, જેમાં દાઉદ ઇબ્રાહિમ સાથે દુબઈમાં થયેલી બે મુલાકાતોનો ઉલ્લેખ પણ સામેલ છે.
ઋષિ કપૂરે ઈન્ડિયા ટીવીને આપેલા ઈન્ટરવ્યુમાં જણાવ્યું હતું કે 1988માં તેઓ આર.ડી. બર્મન, આશા ભોસલે અને બિટ્ટુ આનંદ સાથે એક શો માટે દુબઈ ગયા હતા. ત્યાં એક વ્યક્તિએ તેમને ફોન આપ્યો અને કહ્યું, “ભાઈ વાત કરશે.” ત્યારબાદ દાઉદે તેમને ચા પર ઘરે બોલાવ્યા. ઋષિએ કહ્યું કે તેમને એમાં કંઈ ખોટું ન લાગ્યું, કારણ કે તે સમયે દાઉદ ભાગેડુ હતો અને તેના પર પાછળથી લાદવામાં આવેલા ગંભીર આરોપો નહોતા.
ઋષિએ જણાવ્યું કે દાઉદે તેમને ઘરે લાવવા રોલ્સ રોયસ ગાડી મોકલી હતી. મુલાકાત લગભગ ચાર કલાક ચાલી હતી, દરમિયાન તેમણે બે કપ ચા પીધી. દાઉદે તેમની ફિલ્મ ‘તવાયફ’માં પાત્રનું નામ દાઉદ રાખવા બદલ વખાણ કર્યા હતા. 1985માં આવેલી આ ફિલ્મમાં ઋષિએ દાઉદ મોહમ્મદ અલી ખાન યુસુફઝઈ નામનું પાત્ર ભજવ્યું હતું.
રાજ કપૂરના નિધન બાદ જૂન 1988માં દાઉદે શોક વ્યક્ત કરવા તેમના માણસને ઋષિના ઘરે મોકલ્યો હતો. ઋષિએ કહ્યું કે દાઉદ તેમના પિતાનો મોટો ચાહક હતો.
બીજી મુલાકાત 1989માં અચાનક થઈ હતી. ઋષિ પત્ની નીતુ સાથે દુબઈના જૂતાની દુકાનમાં હતા ત્યારે દાઉદ તેમના બોડીગાર્ડ્સ સાથે આવ્યો અને વાત કરી. દાઉદે કંઈક ખરીદી આપવાની ઓફર કરી, પણ ઋષિએ ના પાડી. ઋષિએ કહ્યું કે તેમને દાઉદને મળવામાં કંઈ ખોટું ન લાગ્યું અને ક્યારેક આવા લોકો પાસેથી ફિલ્મો માટે પ્રેરણા મળે છે. 2013ની ફિલ્મ ‘ડી-ડે’માં તેમણે દાઉદથી પ્રેરિત પાત્ર ભજવ્યું હતું.
ઋષિ કપૂરે 1970માં ‘મેરા નામ જોકર’થી બાળકલાકાર તરીકે કારકિર્દી શરૂ કરી અને 1973માં ‘બોબી’થી મુખ્ય ભૂમિકામાં ડેબ્યૂ કર્યું. તેમણે 100થી વધુ ફિલ્મોમાં કામ કર્યું. ‘કર્ઝ’, ‘ચાંદની’, ‘નગીના’, ‘પ્રેમ રોગ’ અને ‘સાગર’ જેવી રોમેન્ટિક ફિલ્મો ઉપરાંત ‘અગ્નિપથ’, ‘મુલ્ક’ અને ‘102 નોટ આઉટ’ જેવી ફિલ્મોમાં તેમના અભિનયને વખાણવામાં આવ્યો. તેમની છેલ્લી ફિલ્મ ‘શર્માજી નમકીન’ 2022માં રિલીઝ થઈ હતી.