નવી દિલ્હી: ભારતીય ક્રિકેટ કંટ્રોલ બોર્ડ (BCCI)ની સિનિયર મેન્સ સિલેક્શન કમિટીએ બુધવારે ત્રણ અલગ-અલગ ભારતીય ટીમોની જાહેરાત કરી હતી. આમાંથી એક ટીમ રેસ્ટ ઓફ ઈન્ડિયા છે, જેની કેપ્ટનશિપ રિષભ પંતને સોંપવામાં આવી છે.
રિષભ પંત ઈરાની કપમાં રેસ્ટ ઓફ ઈન્ડિયા ટીમનું નેતૃત્વ કરશે. જોકે, તે ફક્ત એક જ મેચમાં કપ્તાની કરશે, કારણ કે ઈરાની કપમાં ફક્ત એક જ મેચ રમાય છે.
ઈરાની કપની આ મેચ રેસ્ટ ઓફ ઈન્ડિયા અને વર્તમાન રણજી ટ્રોફી ચેમ્પિયન જમ્મુ અને કાશ્મીર વચ્ચે રમાશે. આ મેચ 1 થી 5 ઓક્ટોબર દરમિયાન જમ્મુ અને કાશ્મીરની રાજધાની શ્રીનગરના શેર-એ-કાશ્મીર સ્ટેડિયમમાં રમાશે. આનાથી પંતને તેની કેપ્ટનશિપ કૌશલ્ય દર્શાવવાની તક મળે છે.
રિષભ પંત ઉપરાંત, સરફરાઝ ખાનને પણ ટીમમાં પસંદ કરવામાં આવ્યો છે. તેને વાઈસ-કેપ્ટન બનાવવામાં આવ્યો છે. સ્પિનર માનવ સુથાર પણ રેસ્ટ ઓફ ઈન્ડિયા તરફથી રમશે.
આ ટીમમાં સૌથી ચોંકાવનારું નામ ફાસ્ટ બોલર આકાશ દીપનું છે, જે ઈજાને કારણે ઘણા મહિનાઓથી મેદાનથી દૂર છે. તેનો સમાવેશ કરવામાં આવ્યો છે, પરંતુ તેણે ફિટનેસ ટેસ્ટ પાસ કરવી પડશે, ત્યાર બાદ જ તે રમી શકશે.
રેસ્ટ ઓફ ઈન્ડિયા ટીમ: રિષભ પંત (કેપ્ટન, વિકેટકીપર), સનત સાંગવાન, શિખર મોહન, સુદીપ ઘરમી, સરફરાઝ ખાન (વાઈસ-કેપ્ટન), સ્મરણ રવિચંદ્રન, માનવ સુથાર, સરંશ જૈન, આકાશ દીપ (ફિટનેસને આધીન), મુકેશ કુમાર, મુકેશ ચૌધરી, આર્યન જુયાલ (વિકેટકીપર), આર્યન પાંડે, અનુકુલ રોય, આયુષ ડોસેજા.
ઉલ્લેખનીય છે કે, રિષભ પંતની ODI ટીમમાં વાપસીની આશા ફરી એકવાર ઠગારી નીવડી છે. વેસ્ટ ઈન્ડિઝ સામેની ODI શ્રેણી માટે બેકઅપ વિકેટકીપર તરીકે પંતને તક આપવામાં આવી ન હતી.