એસોસિએશન ફોર ડેમોક્રેટિક રિફોર્મ્સ (ADR) એ રાજ્યસભાના સાંસદોની સંપત્તિ અંગેનો તાજેતરનો રિપોર્ટ જાહેર કર્યો છે. આ રિપોર્ટ સાંસદોએ ચૂંટણી સમયે રજૂ કરેલા સોગંદનામા પર આધારિત છે. રિપોર્ટમાં પક્ષવાર અને રાજ્યવાર આંકડા રજૂ કરવામાં આવ્યા છે.
રિપોર્ટ મુજબ, દેશમાં 104 રાજ્યસભા સાંસદો એવા છે જેમની પાસે 10 કરોડ રૂપિયા કે તેથી વધુની સંપત્તિ છે. આ આંકડો અન્ય તમામ આંકડાઓ કરતાં ઘણો વધારે છે.
યાદીમાં પ્રથમ ક્રમે તેલંગાણાના ભારત રાષ્ટ્ર સમિતિ (BRS)ના સાંસદ ડૉ. બંદી પાર્થ સારાધી રેડ્ડી છે. તેમની કુલ સંપત્તિ 53 અબજ રૂપિયા (5,300 કરોડ)થી વધુ છે. તેમના સોગંદનામા મુજબ, તેમની જંગમ સંપત્તિ 52,15,25,82,610 રૂપિયા અને સ્થાવર સંપત્તિ 84,95,67,300 રૂપિયા છે.
બીજા ક્રમે પંજાબના ભારતીય જનતા પાર્ટી (BJP)ના સાંસદ રાજિન્દર ગુપ્તા છે. તેમની કુલ સંપત્તિ 5,053 કરોડ રૂપિયા આંકવામાં આવી છે. તેમની જંગમ સંપત્તિ 44,372,989,181 રૂપિયા અને સ્થાવર સંપત્તિ 6,157,469,530 રૂપિયા છે.
ત્રીજા ક્રમે કોંગ્રેસના દિગ્ગજ નેતા અને તેલંગાણાથી રાજ્યસભાના સાંસદ ડૉ. અભિષેક મનુ સિંઘવી છે. તેમની કુલ સંપત્તિ 2,558 કરોડ રૂપિયા છે. તેમની જંગમ સંપત્તિ 2,104,74,05,863 રૂપિયા અને સ્થાવર સંપત્તિ 45,35,00,000 રૂપિયા છે.
રાજ્યોની વાત કરીએ તો, તેલંગાણાના સાંસદો 8,310 કરોડ રૂપિયાની કુલ સંપત્તિ સાથે પ્રથમ ક્રમે છે. ત્યારબાદ પંજાબના સાંસદો 5,729 કરોડ અને ઉત્તર પ્રદેશના સાંસદો 3,471 કરોડ રૂપિયાની સંપત્તિ સાથે છે. અન્ય રાજ્યોમાં આંધ્ર પ્રદેશ (1,949 કરોડ), ઓડિશા (1,242 કરોડ), મહારાષ્ટ્ર (1,063 કરોડ), તમિલનાડુ (886 કરોડ), ગુજરાત (815 કરોડ), ઝારખંડ (779 કરોડ) અને હરિયાણા (404 કરોડ)નો સમાવેશ થાય છે.
પક્ષવાર આંકડા જોઈએ તો, BJPના 111 સાંસદો પાસે કુલ 8,270 કરોડ રૂપિયાની સંપત્તિ છે. BRSના માત્ર 3 સાંસદો પાસે 5,524 કરોડ રૂપિયાની સંપત્તિ છે. કોંગ્રેસના 29 સાંસદો પાસે 3,781 કરોડ રૂપિયાની સંપત્તિ નોંધાઈ છે. આ ઉપરાંત અન્ય પ્રાદેશિક પક્ષો અને અપક્ષ સાંસદોનો પણ સમાવેશ થાય છે.