મુંબઈ: હિન્દી સિનેમાના જાણીતા અભિનેતા મુશ્તાક ખાનનું 24 સપ્ટેમ્બરે નિધન થયું હતું. 25 સપ્ટેમ્બરે મુંબઈમાં તેમના અંતિમ સંસ્કાર કરવામાં આવ્યા. પરંતુ આ પીઢ કલાકારની અંતિમ વિદાયમાં બોલીવુડના કોઈ મોટા સ્ટાર હાજર ન રહેતાં સિનિયર અભિનેતા રઝા મુરાદે નારાજગી વ્યક્ત કરી છે.
રઝા મુરાદે પ્રશ્ન ઉઠાવ્યો કે જે વ્યક્તિએ પોતાનું આખું જીવન સિનેમા માટે સમર્પિત કર્યું, તેના માટે ઉદ્યોગના સ્ટાર્સ પાસે 50 મિનિટનો સમય પણ નહોતો? તેમણે કહ્યું કે દુઃખની વાત છે કે આ પ્રસંગે કોઈ મોટા સ્ટારે આવીને તેમને છેલ્લી વિદાય આપી નહીં. જ્યારે ઘણા સહ-કલાકારો અને અભિનેતાઓ હાજર રહ્યા હતા.
રઝા મુરાદે વધુમાં કહ્યું કે જો કોઈ ઉદ્યોગપતિના દીકરાના લગ્ન હોય તો આ સિતારાઓ ફક્ત હાજરી જ ન આપે, પણ મહેમાનોની સેવા વેઈટરની જેમ કરે. રાજકીય પક્ષ શક્તિ દર્શાવે ત્યારે પણ આ જ સિતારાઓ હાજર થઈ જાય છે. પરંતુ જે વ્યક્તિએ ઇન્ડસ્ટ્રીને 50 વર્ષ આપ્યા, તેના માટે 50 મિનિટ પણ ફાળવી શકાઈ નહીં.
તેમણે કહ્યું કે યાદ રાખો, આજે તમારો ચહેરો ચમકે છે, કાલે તે પણ ઝાંખો પડી જશે. જો કંઈ કામ આવશે તો તમારો સારો વ્યવહાર અને કર્મો જ કામ આવશે. માન-સન્માન અને સંપત્તિ કાયમ રહેતાં નથી.
મુશ્તાક ખાનની પ્રશંસા કરતાં રઝા મુરાદે કહ્યું કે તેમણે પોતાના અદ્ભુત કામના દમ પર ઓળખ ઊભી કરી હતી. ઇન્ડસ્ટ્રીમાં ટકી રહેવા માટે તેમણે ક્યારેય કોઈની ચાપલૂસી કરી નહોતી. તેમને જીવતેજીવ પણ આવા કહેવાતા મોટા સ્ટાર્સની જરૂર નહોતી પડી અને મૃત્યુ પછી પણ નહીં પડે.